భారతీయ మూలాలు కలిగిన ఒక బాలిక బెటాలియన్ కమాండింగ్ అధికారిగా ఎంపిక కావడం ప్రపంచ వ్యాప్తంగా చర్చనీయాంశం అయింది. . కేవలం 17 ఏళ్ల వయస్సులోనే క్వీన్స్లోని బెంజమిన్ ఎన్. కార్డోజో ఉన్నత పాఠశాలలో నిర్వహించే నౌకాదళ జూనియర్ రిజర్వ్ అధికారుల శిక్షణ దళం (ఎన్జేఆర్ఓటీసీ)లో భారతీయ మూలాలు ఉన్న విద్యార్థిని రిద్ధి చౌహాన్ బెటాలియన్ కమాండింగ్ అధికారిగా ఎంపికైంది.
ఎన్జేఆర్ఓటీసీ అమెరికా నౌకాదళం ఆధ్వర్యంలో ఉన్నత పాఠశాలల్లో నిర్వహించే నాయకత్వ శిక్షణ కార్యక్రమం. విద్యార్థుల్లో నాయకత్వ లక్షణాలు, క్రమశిక్షణ, వ్యక్తిత్వ వికాసం, జట్టుగా పనిచేసే సామర్థ్యాన్ని పెంపొందించడం దీని ప్రధాన లక్ష్యం.
బెటాలియన్ కమాండింగ్ అధికారిగా రిద్ధి దాదాపు 300 మంది క్యాడెట్లకు నాయకత్వం వహిస్తోంది. బెటాలియన్ నిర్వహణ, శిక్షణ, విద్యార్థుల సంక్షేమం వంటి బాధ్యతలను నిర్వర్తిస్తూ చదువును కూడా సమర్థంగా కొనసాగిస్తోంది. వారంలో నాలుగు రోజులు ఉదయం 7 గంటలకు ముందే పాఠశాలకు చేరుకుని తరగతులు ప్రారంభమయ్యే ముందు డ్రిల్ శిక్షణ నిర్వహిస్తోంది. ఈ కఠినమైన దినచర్య తన జీవితంలో అత్యంత సంతృప్తికరమైన అనుభవమని ఆమె చెబుతోంది.
బెటాలియన్ కమాండింగ్ అధికారిగా ఎంపికకు ముందు రిద్ధి అకాడెమిక్ కమాండర్, విజ్ఞాన–సాంకేతిక విభాగ కమాండర్, ప్లాటూన్ నాయకురాలు, తనిఖీ కమాండర్ వంటి పలు కీలక బాధ్యతలు నిర్వహించింది. అకాడెమిక్ కమాండర్గా ఉన్నప్పుడు ఆమె నాయకత్వంలో పాఠశాల బృందం వరుసగా రెండేళ్లు లీడర్షిప్ అండ్ అకాడెమిక్ బౌల్ రెండో దశకు అర్హత సాధించడంతో పాటు జాతీయ స్థాయి విద్యా పరీక్షలో తొలి స్థానం దక్కించుకుంది.
విజ్ఞాన–సాంకేతిక విభాగ కమాండర్గా పనిచేసిన సమయంలో తన సహచర క్యాడెట్లతో కలిసి పాఠశాల తొలి “సీపర్చ్” నీటి అడుగున పనిచేసే రోబోట్ను స్వయంగా రూపొందించి నిర్మించింది. అంతేకాకుండా 200 మందికిపైగా క్యాడెట్లకు మార్గదర్శకత్వం వహించి శిక్షణ అందించింది.
తన నాయకత్వానికి ప్రేరణ బీఏపీఎస్ స్వామినారాయణ సంస్థ ఆధ్యాత్మిక గురువు మహంత్ స్వామి మహారాజ్ బోధనలు, యువత అభివృద్ధి కార్యక్రమాలేనని రిద్ధి పేర్కొంది. నాయకత్వం అంటే అధికారం ప్రదర్శించడం కాదని, ఇతరుల జీవితాలపై సానుకూల ప్రభావం చూపించడమేనని ఆమె అభిప్రాయపడింది. ఒత్తిడి పరిస్థితుల్లోనూ స్థిరంగా ఉండటం, సవాళ్లను స్వీకరించడం విజయానికి కీలకమని తెలిపింది.
రిద్ధి ప్రస్తుతం నావల్ అకాడమీ ప్రిపరేటరీ పాఠశాలలో చేరేందుకు సిద్ధమవుతోంది. అక్కడి నుంచి అమెరికా నావల్ అకాడమీలో ప్రవేశించి భవిష్యత్తులో అమెరికా నౌకాదళ అధికారిణిగా సేవలందించాలనే లక్ష్యంతో ముందుకు సాగుతోంది.
రిద్ధి చౌహాన్ తల్లిదండ్రులు రుచికా చౌహాన్, దిలీప్ చౌహాన్. వారి కుటుంబ మూలాలు రాజస్థాన్లోని జైపూర్కు చెందినవి. అనంతరం వారు న్యూయార్క్లో స్థిరపడ్డారు. ఆమె సోదరి కాహినీ గుప్తా చౌహాన్ వైద్య రంగంలో పనిచేస్తున్నారు. విద్య, నాయకత్వం, ప్రజాసేవకు కుటుంబం ఇచ్చిన ప్రాధాన్యతే తన విజయాలకు బలమైన పునాదిగా నిలిచిందని రిద్ధి పేర్కొంది.
