పెట్రోల్‌లో 20 శాతం ఇథనాల్ కలుపుతున్నట్లు ప్రభుత్వం చెబుతున్నప్పటికీ కర్ణాటక ప్రభుత్వం సేకరించిన నమూనాల పరీక్షల్లో అంతకంటే ఎక్కువ మోతాదులో ఇథనాల్ ఉన్నట్లు వెల్లడైందని కాంగ్రెస్ అగ్రనేత, లోక్‌సభ ప్రతిపక్ష నాయకుడు రాహుల్ గాంధీ ఆరోపించారు.
ఎక్స్‌లో హిందీలో స్పందించిన రాహుల్ గాంధీ ఈ20ను 420గా మార్చేశారంటూ విమర్శించారు. వాహనదారుల నుంచి పెట్రోల్ పేరుతో మోసం చేస్తున్నారని ఆరోపించారు. గతంలో భారత శిక్షాస్మృతిలోని 420వ సెక్షన్ మోసానికి సంబంధించిన నేరాన్ని సూచించేదని గుర్తుచేస్తూ కేంద్ర ప్రభుత్వంపై వ్యంగ్యాస్త్రాలు సంధించారు.
కర్ణాటకలోని ఏడు జిల్లాల నుంచి పెట్రోల్ నమూనాలను సేకరించి గుర్తింపు పొందిన ప్రయోగశాలలో పరీక్షించిందని రాహుల్ గాంధీ తెలిపారు. మొత్తం 14 నమూనాల్లో 11 నమూనాల్లో ఇథనాల్ శాతం 20 శాతానికి మించి ఉన్నట్లు పరీక్షల్లో వెల్లడైందని పేర్కొన్నారు. ఇండియన్ ఆయిల్ కార్పొరేషన్‌కు చెందిన ఒక నమూనాలో 31.2 శాతం, హిందుస్థాన్ పెట్రోలియం నమూనాలో 30.5 శాతం ఇథనాల్ ఉన్నట్లు పరీక్షల్లో తేలిందని వివరించారు. ప్రభుత్వ రంగ సంస్థలతో పాటు ప్రైవేటు సంస్థల పెట్రోల్ నమూనాల్లోనూ నిర్ణీత పరిమితిని మించిన ఇథనాల్ ఉన్నట్లు ఆయన ఆరోపించారు.
వాహనాల మైలేజీ తగ్గడం, ఇంజిన్ నిర్వహణ ఖర్చులు పెరగడం వంటి సమస్యలు తలెత్తే అవకాశం ఉందన్నారు. పెట్రోల్ బంకుల్లో విక్రయిస్తున్న ఇంధనంలో ఎంత శాతం ఇథనాల్ ఉందో వినియోగదారులకు తెలియజేసే విధంగా ఎలాంటి స్పష్టమైన సమాచారం ఎందుకు ప్రదర్శించడం లేదని ప్రశ్నించారు. పెట్రోల్‌లో వాస్తవంగా ఎంత ఇథనాల్ కలుపుతున్నారు? నిర్ణీత 20 శాతం పరిమితిని మించి కలుపుతున్న కంపెనీలపై ఎప్పుడు చర్యలు తీసుకుంటారు? అని ప్రధానమంత్రి నరేంద్ర మోదీని ప్రశ్నించారు.
బెంగళూరు, కోలార్, చిక్కబళ్లాపుర, బెంగళూరు గ్రామీణ, రామనగర, మంగళూరు, తుమకూరు జిల్లాల నుంచి నమూనాలను సేకరించి పరీక్షించినట్లు కర్ణాటక ఆహార, పౌరసరఫరాలు, వినియోగదారుల వ్యవహారాలు, న్యాయ కొలతల శాఖ మంత్రి రిజ్వాన్ అర్షద్ వెల్లడించారు.
బెంగళూరులోని శ్రీరామ్ పరిశోధనా సంస్థలో ఈ నమూనాలను పరీక్షించినట్లు మంత్రి తెలిపారు. ఈ సంస్థ జాతీయ పరీక్షా, క్రమాంకన ప్రయోగశాలల గుర్తింపు మండలి గుర్తింపు పొందిన, అంతర్జాతీయ ప్రమాణాల ధ్రువీకరణ కలిగిన సంస్థగా పేర్కొన్నారు. పరీక్షల నివేదికల ప్రకారం ఇండియన్ ఆయిల్ కార్పొరేషన్ నమూనాలో 31.2 శాతం, హిందుస్థాన్ పెట్రోలియం నమూనాలో 30.5 శాతం ఇథనాల్ ఉన్నట్లు వెల్లడైందని చెప్పారు. ఇతర ప్రధాన ఇంధన సంస్థల నమూనాల్లోనూ 20 శాతానికి మించిన మోతాదులు నమోదైనట్లు ఆరోపించారు.
కర్ణాటక ప్రభుత్వం చేసిన ఆరోపణలను ప్రభుత్వ రంగ చమురు విక్రయ సంస్థలు తీవ్రంగా ఖండించాయి. ఇండియన్ ఆయిల్ కార్పొరేషన్, భారత్ పెట్రోలియం కార్పొరేషన్, హిందుస్థాన్ పెట్రోలియం కార్పొరేషన్ సంస్థలు సంయుక్త ప్రకటన విడుదల చేశాయి. దేశవ్యాప్తంగా తమ పెట్రోల్ బంకుల ద్వారా సరఫరా చేస్తున్న ఈ20 పెట్రోల్ బ్యూరో ఆఫ్ ఇండియన్ స్టాండర్డ్స్ నిర్దేశించిన ఐఎస్ 17021 ప్రమాణాలకు అనుగుణంగానే ఉందని స్పష్టం చేశాయి. ఈ ప్రమాణాల ప్రకారం పెట్రోల్‌లో ఇథనాల్ శాతం 19 నుంచి 21 మధ్య ఉండాలి. కర్ణాటక ప్రభుత్వం వెల్లడించిన పరీక్షా ఫలితాలు చట్టబద్ధమైన, సాంకేతికంగా నిర్దేశించిన పరీక్షా విధానాలకు అనుగుణంగా లేవని సంస్థలు పేర్కొన్నాయి. మూడో పక్ష ప్రయోగశాలలు జారీ చేసిన ధ్రువీకరణ పత్రాల్లో పరీక్షా విధానానికి సంబంధించిన పూర్తి వివరాలు లేవని, అందువల్ల ఆ ఫలితాలను స్వతంత్రంగా నిర్ధారించలేమని అభ్యంతరం వ్యక్తం చేశాయి.
