తమిళనాడు ముఖ్యమంత్రి విజయ్ నటించిన జన నాయకన్ సినిమాకు కర్నాటకలో తీవ్ర నిరసనలు ఎదురవుతున్నాయి. కావేరీ జలాలకు సంబంధించి కర్నాటకకు అన్యాయం చేస్తున్న తమిళనాడు ముఖ్యమంత్రి సినిమా ఆడటానికి వీల్లేదని ప్రేక్షకులు డిమాండ్ చేస్తున్నారు.
తమిళనాడు ముఖ్యమంత్రి, సినీ నటుడు విజయ్ ప్రధాన పాత్రలో నటించిన ‘జన నాయకన్’ సినిమా ప్రదర్శన కర్ణాటకలోని మండ్య జిల్లాలో వివాదానికి దారితీసింది. కావేరి జలాల అంశంపై ఆగ్రహం వ్యక్తం చేస్తూ విజయ సేన (Vijaya Sena) సంస్థ సభ్యులు గురుశ్రీ థియేటర్ ఎదుట ఆందోళన చేపట్టడంతో సినిమా ప్రదర్శనకు అంతరాయం ఏర్పడింది.
సినిమా ప్రదర్శన జరుగుతున్న సమయంలో విజయ సేన కార్యకర్తలు గురుశ్రీ థియేటర్‌ను ముట్టడించి నినాదాలు చేశారు. రాష్ట్ర అధ్యక్షుడు దీపక్ నాయకత్వంలో జరిగిన ఈ నిరసనలో, వెంటనే ‘జన నాయకన్’ ప్రదర్శనను నిలిపివేయాలని డిమాండ్ చేశారు. ఈ మేరకు థియేటర్ యాజమాన్యానికి వినతిపత్రాన్ని కూడా అందజేశారు.
నిరసనకారులతో చర్చలు జరిపిన అనంతరం, పరిస్థితులను దృష్టిలో ఉంచుకుని సినిమా ప్రదర్శనను నిలిపివేస్తామని థియేటర్ యాజమాన్యం హామీ ఇచ్చినట్లు సమాచారం.
ఆందోళనలో భాగంగా విజయ సేన సభ్యులు ‘జన నాయకన్’ సినిమా పోస్టర్లను చించివేశారు. కావేరి వాటర్ రెగ్యులేషన్ కమిటీ (CWRC) ఆదేశాల మేరకు తమిళనాడుకు నీటిని విడుదల చేయడాన్ని వ్యతిరేకిస్తూ కర్ణాటకలో పలు రైతు, కన్నడ అనుకూల సంఘాలు నిరసనలు వ్యక్తం చేస్తున్నాయి. అదే ఆగ్రహంతో ఈ సినిమా ప్రదర్శనను కూడా లక్ష్యంగా చేసుకున్నట్లు నిరసనకారులు తెలిపారు.
హెచ్. వినోత్ దర్శకత్వంలో తెరకెక్కిన ‘జన నాయకన్’ చిత్రంలో విజయ్‌తో పాటు బాబీ డియోల్, పూజా హెగ్డే, మమితా బైజు కీలక పాత్రలు పోషించారు. పలుమార్లు వాయిదా పడిన ఈ చిత్రం జూలై 23న ప్రపంచవ్యాప్తంగా థియేటర్లలో విడుదలైంది.
వాస్తవానికి ఈ సినిమాను సంక్రాంతి సందర్భంగా జనవరి 9న విడుదల చేయాలని భావించినప్పటికీ, కొన్ని సన్నివేశాలు మతపరమైన భావోద్వేగాలను దెబ్బతీసే అవకాశం ఉందంటూ సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) సర్టిఫికేషన్ ప్రక్రియ ఆలస్యం చేయడంతో విడుదల వాయిదా పడింది.
‘జన నాయకన్’ ఒక రాజకీయ యాక్షన్ డ్రామా. తమిళనాడు ముఖ్యమంత్రిగా బాధ్యతలు చేపట్టిన విజయ్ పూర్తిస్థాయిలో రాజకీయాలపై దృష్టి సారించే ముందు నటించిన చివరి చిత్రంగా ఈ సినిమాపై విస్తృత ప్రచారం జరిగింది. మూడు దశాబ్దాలకుపైగా సినీ జీవితంలో విజయ్ ‘లియో’, ‘బిగిల్’, ‘ఘిల్లి’, ‘పొక్కిరి’ వంటి పలు విజయవంతమైన చిత్రాల్లో నటించి ప్రేక్షకాదరణ పొందారు.
