ఇంట్లో డబ్బు కట్టలు బయటపడ్డ కేసులో న్యాయమూర్తి జస్టిస్ యశ్వంత్ వర్మపై వచ్చిన ఆరోపణలు నిజమేనని తేలింది. న్యాయమూర్తి జస్టిస్ యశ్వంత్ వర్మపై వచ్చిన ఆరోపణలకు సంబంధించి లోక్‌సభ ఏర్పాటు చేసిన ముగ్గురు సభ్యుల విచారణ కమిటీ కీలక నిర్ణయం వెల్లడించింది.
ఆయనపై ఉన్న మూడు ఆరోపణలూ రుజువయ్యాయని కమిటీ తేల్చింది. ఈ మేరకు కమిటీ నివేదికను బుధవారం లోక్‌సభ, రాజ్యసభలో ప్రవేశపెట్టారు. అధికారిక నివాసంలో లెక్కల్లో చూపని నగదు, ముఖ్యంగా కాలిపోయిన రూ.500 నోట్ల లభ్యతకు సంబంధించిన వివాదంలో జస్టిస్ వర్మపై వచ్చిన ఆరోపణలపై కమిటీ స్పష్టమైన నిర్ధారణకు వచ్చింది.
మొదటి ఆరోపణపై విచారణ కమిటీ.. న్యూఢిల్లీలోని 30, తుగ్లక్ క్రెసెంట్‌లో ఉన్న జస్టిస్ వర్మ అధికారిక నివాస ప్రాంగణంలోని స్టోర్‌రూమ్‌లో గణనీయమైన మొత్తంలో లెక్కల్లో చూపని రూ.500 నోట్లను గుర్తించినట్లు తెలిపింది. ఆ నగదు అక్కడ ఎందుకు ఉంది, దాని మూలం ఏమిటి, యాజమాన్యం ఎవరిది అనే అంశాలపై జస్టిస్ వర్మ సంతృప్తికరమైన వివరణ ఇవ్వలేకపోయారని కమిటీ పేర్కొంది. దీంతో మొదటి ఆర్టికల్ ఆఫ్ చార్జ్ రుజువైందని తేల్చింది.
ఆధారాలు చెరిపేయడం కూడా నిజమే
రెండో ఆరోపణకు సంబంధించి స్టోర్‌రూమ్‌లోని కీలక ఆధారాలను సంరక్షించడంలో జస్టిస్ వర్మ విఫలమయ్యారని కమిటీ పేర్కొంది. చట్టబద్ధంగా ఆ ప్రదేశాన్ని సీజ్ చేసి పరిశీలించేలోపు అక్కడి ఆధారాల పరిస్థితి మారిపోయిందని తెలిపింది. అనంతరం అక్కడ ఉన్నట్లు చెప్పబడిన నగదు నోట్లు అందుబాటులో లేకపోవడానికి కూడా సరైన వివరణ లభించలేదని పేర్కొంది.
అయితే, నగదును జస్టిస్ వర్మ స్వయంగా తొలగించారనే నిర్ధారణ ఆధారంగా రెండో ఆరోపణను రుజువు చేసినట్లు కమిటీ స్పష్టం చేసింది. నగదును ఆయనే తీసుకెళ్లారనే ప్రత్యక్ష నిర్ధారణకు బదులుగా.. ఆధారాలను సంరక్షించడంలో ఆయన వైఫల్యం, నివాస ప్రాంగణానికి సంబంధించిన సిబ్బంది ద్వారా ఆ ప్రదేశంలో మార్పులు జరిగేందుకు ఆయన అనుమతించడం, దాని ఫలితంగా కీలక ఆధారాలు కనుమరుగవడం వంటి అంశాల ఆధారంగా ఈ ఆరోపణను రుజువైనదిగా పేర్కొంది.
మూడో ఆరోపణపై కూడా కమిటీ తీవ్ర వ్యాఖ్యలు చేసింది. ముఖ్యంగా 2025 మార్చి 22న జస్టిస్ వర్మ ఇచ్చిన సమాధానంతో పాటు అనంతరం ఆయన తీసుకున్న వైఖరి.. ఈ పరిస్థితుల్లో ఒక న్యాయమూర్తి నుంచి ఆశించే నిజాయితీ, పారదర్శకత, సంస్థాగత బాధ్యతను ప్రతిబింబించలేదని పేర్కొంది. స్వతంత్ర అధికారిక సాక్షుల వాంగ్మూలాలు, ఇతర ఆధారాలతో ఆయన వివరణను పరిశీలించినప్పుడు అది తప్పించుకునే ధోరణిలో, సంతృప్తికరంగా లేనిదిగా కనిపించిందని కమిటీ తెలిపింది.
చివరగా జస్టిస్ యశ్వంత్ వర్మపై ఉన్న మూడు ఆర్టికల్స్ ఆఫ్ చార్జ్—ఆర్టికల్ I, ఆర్టికల్ II, ఆర్టికల్ III—మూడూ రుజువయ్యాయని కమిటీ తన తుది నిర్ధారణలో స్పష్టం చేసింది. విచారణకు సంబంధించిన రికార్డులు, పత్రాలు, ఎగ్జిబిట్లు, ఇతర ఆధారాలతో పాటు నివేదికను తదుపరి చట్టపరమైన చర్యల కోసం సమర్పించినట్లు పేర్కొంది.
జస్టిస్ వర్మ అధికారిక నివాసంలో 2025 మార్చి 14 రాత్రి అగ్ని ప్రమాదం జరగడంతో ఈ వివాదం మొదలైంది. అగ్నిమాపక సిబ్బంది అక్కడికి చేరుకుని స్టోర్‌రూమ్‌లో కాలిపోయిన కరెన్సీ నోట్లను గుర్తించినట్లు ఆరోపణలు వచ్చాయి. దీంతో ఈ వ్యవహారంపై న్యాయపరమైన విచారణ ప్రారంభమై, అనంతరం ఆయనను పదవి నుంచి తొలగించే ప్రక్రియ మొదలైంది.
ఈ వివాదం సమయంలో జస్టిస్ వర్మ ఢిల్లీ హైకోర్టు న్యాయమూర్తిగా ఉన్నారు. అనంతరం ఆయనను ఆయన సొంత న్యాయస్థానమైన అలహాబాద్ హైకోర్టుకు తిరిగి పంపించారు. ఈ వ్యవహారంపై ఏర్పాటైన ముగ్గురు సభ్యుల విచారణ కమిటీ తన నివేదికను మే నెలలో లోక్‌సభ స్పీకర్ ఓం బిర్లాకు సమర్పించింది.
ఇదిలా ఉండగా, జస్టిస్ యశ్వంత్ వర్మ ఇప్పటికే రాజీనామా చేశారు. దీంతో ఆయనను పదవి నుంచి తొలగించేందుకు చేపట్టిన ప్రక్రియ ఆచరణలో దాదాపు నిరుపయోగంగా మారింది. అయితే ఆయన రాజీనామాను కేంద్ర న్యాయ మంత్రిత్వ శాఖ ఇంకా అధికారికంగా నోటిఫై చేయలేదు. ఈ నేపథ్యంలో విచారణ కమిటీ మూడు ఆరోపణలూ రుజువయ్యాయని తేల్చడం న్యాయవ్యవస్థలో బాధ్యత, పారదర్శకతపై మరోసారి చర్చకు దారితీసే అవకాశం ఉంది.
