రెమాల్ తుఫాను ప్రభావంతో ఎడతెరిపి లేకుండా కురుస్తున్న వర్షాల మధ్య మంగళవారం ఉదయం మిజోరంలోని ఐజ్వాల్ జిల్లాలో రాయి క్వారీ కూలిపోవడంతో 12 మంది మరణించగా, పలువురు గల్లంతైనట్లు అధికారులు తెలిపారు. ఐజ్వాల్ పట్టణం దక్షిణ శివార్లలోని మెల్తుమ్, హ్లిమెన్ మధ్య ప్రాంతంలో ఉదయం 6 గంటలకు ఈ సంఘటన జరిగిందని వారు తెలిపారు.”ఇప్పటి వరకు పన్నెండు మృతదేహాలను వెలికితీశారు. ఇంకా అనేక మంది శిథిలాల కింద చిక్కుకున్నట్లు అనుమానిస్తున్నారు” అని ఐజ్వాల్ డిప్యూటీ కమిషనర్ నజుక్ కుమార్ తెలిపారు.
“మేము మరిన్ని మృతదేహాల కోసం వెతుకుతున్నాము. మేము మొత్తం సైట్‌ను క్లియర్ చేసే వరకు కార్యకలాపాలు కొనసాగుతాయి, ”అని అన్నారు. భారీ వర్షాలు విపత్తు ప్రదేశంలో సహాయక చర్యలను ప్రభావితం చేస్తున్నాయని డైరెక్టర్ జనరల్ ఆఫ్ పోలీస్ (డిజిపి) అనిల్ శుక్లా తెలిపారు.
ఈ వర్షాల కారణంగా రాష్ట్రంలోని అనేక చోట్ల కొండచరియలు విరిగిపడ్డాయని, కనీసం ఇద్దరు వ్యక్తులు కొట్టుకుపోయారని ఆయన అన్నారు. రాతి క్వారీ కూలిపోయిన బాధితుల్లో నాలుగేళ్ల బాలుడు, ఆరేళ్ల బాలిక కూడా ఉన్నారని మరో పోలీసు అధికారి తెలిపారు.”మేము సైట్ నుండి ఇద్దరు వ్యక్తులను సజీవంగా రక్షించాము,” అని ఆయన చెప్పారు.
ఐజ్వాల్‌లోని సేలం వెంగ్‌లో కొండచరియలు విరిగిపడటంతో ఒక భవనం కొట్టుకుపోయింది. ముగ్గురు వ్యక్తులు అదృశ్యమయ్యారు. వారి కోసం అన్వేషణ కొనసాగుతోందని ఓ అధికారి తెలిపారు. హంథర్ వద్ద జాతీయ రహదారి 6పై కొండచరియలు విరిగిపడటంతో రాష్ట్ర రాజధానికి దేశంలోని ఇతర ప్రాంతాలతో సంబంధాలు తెగిపోయాయని అధికారులు తెలిపారు.
అంతేకాకుండా, అనేక ఇంట్రా-స్టేట్ హైవేలు కూడా కొండచరియలు విరిగిపడటంతో అంతరాయం కలిగిందని వారు తెలిపారు. క్వారీ కూలిపోవడంతో పాటు వర్షాల కారణంగా సంభవించిన విపత్తులలో మరణించిన వారి కుటుంబాలకు ముఖ్యమంత్రి లాల్దుహోమ రూ.4 లక్షల ఎక్స్‌గ్రేషియా ప్రకటించారు. క్వారీ కూలిన ఘటనలో మృతి చెందిన ఎనిమిది మంది మిజోలకు చెందిన కుటుంబాలకు ఒక్కొక్కరికి రూ.2 లక్షల చెక్కులను అందజేసి, మిగిలిన మొత్తాన్ని త్వరలోనే అందజేస్తామని తెలిపారు.
హోం మంత్రి కె సప్దంగా మాట్లాడుతూ, “నలుగురు గిరిజనేతరుల గుర్తింపులు ధృవీకరించుకోవాల్సి ఉంది. వారు మిజోరంలో శాశ్వత నివాసితులైతే, వారికి ఎక్స్‌గ్రేషియా మొత్తం ఇస్తాము. వారు తాత్కాలికంగా పని చేయడానికి ఇక్కడకు వస్తే, వారికి ఆర్థిక సహాయం లభించదు అని ఆయన తెలిపారు. ”రెమాల్ తుపాను ప్రభావంతో సంభవించిన వర్షాల వల్ల సంభవించే విపత్తులను పరిష్కరించడానికి ప్రభుత్వం రూ.15 కోట్లను కేటాయించిందని లాల్దుహోమ తెలిపారు.
విపత్తు నిర్వహణ మరియు పునరావాస శాఖను నిర్వహించే సప్దంగాతో పాటు లాల్దుహోమా రాతి క్వారీ స్థలాన్ని సందర్శించి పరిస్థితిని పరిశీలించి, సహాయక చర్యలను పర్యవేక్షించారు. వర్షాల కారణంగా, అన్ని పాఠశాలలు మూసివేశారు. అవసరమైన సేవలను అందించడంలో పాల్గొనే ప్రభుత్వ ఉద్యోగులు తప్ప, మిగిలిన అందరూ ఇంటి నుండి పని చేయాలని కోరారు.
ఐజ్వాల్‌కు 21 కిలోమీటర్ల దూరంలోని సాయిరాంగ్ గ్రామం వద్ద త్లాంగ్ నదికి అపూర్వమైన వరదలు రావడంతో 30కి పైగా కుటుంబాలను సురక్షిత ప్రాంతాలకు తరలించినట్లు సీనియర్ అధికారి తెలిపారు. ”నదీ తీరంలోని అనేక పొలాలు పూర్తిగా నీట మునిగాయి. నీటిమట్టం అంతకంతకూ పెరుగుతోంది. అయితే, ఎటువంటి ప్రాణనష్టం జరగలేదు”అన్నారాయన. ఐజ్వాల్ పట్టణంలో, కొన్ని స్మశానవాటికలు కూడా కొట్టుకుపోయాయి.150కి పైగా సమాధులు దెబ్బతిన్నాయి.
