టర్కీలో పేలుడు సంభవించింది. రాజధాని ఇస్తాంబుల్‌లోని తక్సిమ్ స్క్వేర్ నుంచి బాంబు పేలుడు సంభవించినట్లు వార్తలు వస్తున్నాయి. ఈ పేలుడులో ఆరుగురు చనిపోయారు. ఇప్పటి వరకు 53 మంది గాయపడినట్లు సమాచారం. ఇస్తాంబుల్‌లోని అత్యంత రద్దీగా ఉండే ప్రాంతంలో ఆదివారం పేలుడు సంభవించింది. ఈ ప్రధాన నడకదారిపై పెద్ద సంఖ్యలో ప్రజలు ఉండగా ఈ పేలుడు జరిగింది.
ఈ పేలుడు ఘటనను అధ్యక్షుడు రెసెప్ తయ్యిప్ ఎర్డోగాన్ ఖండించారు. ఇందులో ఉగ్రవాదుల హస్తం కూడా ఉందని అనుమానం వ్యక్తం చేశారు. పేలుడు సంభవించిన తర్వాత అంబులెన్స్‌లు, అగ్నిమాపక వాహనాలు ఘటనాస్థలికి చేరుకున్నాయి. పోలీసులు కూడా సహాయక చర్యలు ప్రారంభించారు. పేలుడుకు గల కారణాలు ఇంకా తెలియాల్సి ఉంది. పేలుడు తర్వాత ఆ ప్రాంతాన్ని ఖాళీ చేయించారు. ఆ ప్రాంతంలో దుకాణాలు మూతపడ్డాయి. ఈ ఘటనలో పలువురు మృతి చెంది ఉంటారని భావిస్తున్నారు.
స్థానిక కాలమానం ప్రకారం సాయంత్రం 4:20 గంటలకు పేలుడు సంభవించిందని ఇస్తాంబుల్ గవర్నర్ అలీ యెర్లికాయ ట్విట్టర్‌లో తెలిపారు. సోషల్ మీడియాలో కూడా చాలా వీడియోలు వైరల్ అవుతున్నాయి. పేలుడు జరిగిన ప్రదేశం నుంచి మంటలు వెలువడుతున్నట్లు వీడియోలో కనిపిస్తోంది. పేలుడు శబ్ధం వీడియోలో ఉంది. పేలుడు తర్వాత బాటసారులు పరుగులు తీశారు. ఇది పర్యాటకులతో ప్రసిద్ధి చెందిన రద్దీగా ఉండే మార్గం.
ఇక్కడ చాలా దుకాణాలు మరియు రెస్టారెంట్లు ఉన్నాయి. గతంలో 2015, 2017లో కూడా పేలుళ్లు జరిగాయి. దీనికి ఇస్లామిక్ స్టేట్ మరియు కొన్ని కుర్దిష్ గ్రూపులు బాధ్యత వహించాయి. ఈ విషయంపై భారత్ కూడా స్పందించింది. ఈ రోజు ఇస్తాంబుల్‌లో జరిగిన పేలుడులో విషాదకరమైన ప్రాణనష్టం పట్ల టర్కీ ప్రభుత్వానికి మరియు ప్రజలకు భారతదేశం తన ప్రగాఢ సంతాపాన్ని తెలియజేస్తున్నట్లు విదేశాంగ మంత్రిత్వ శాఖ ప్రతినిధి అరిందమ్ బాగ్చి తెలిపారు. గాయపడిన వారికి సానుభూతి కూడా తెలిపారు.
