అనుక్షణం నిరీక్షించి
నీరసించి నిర్వేదమైన వేళ
తపించిన మనసును చల్లని పిల్లగాలి చుట్టుకున్న ఆనందహేల
ఉరుములే మంగళవాద్యాలై
నల్లని మబ్బుతునకలు ఏడువారాల కానుకై
మెరుపు దివిటీలు దారి చూపిస్తుంటే
మేఘాల గుర్రమెక్కి
తలంబ్రాలై తొలకరిజల్లులు జాలువారగా
తపనల చినుకుల చిరు స్పర్శలో
ఒక్కసారిగా ఝల్లుమన్న
పుడమి అణువణువున పులకరింపుల
వేణువులే
ఎదురుచూస్తున్న ఆ మట్టిరేణువుల
గుండె గూటిలో
వేవేల వేకువల సంభ్రమలే
దూరం భారమై విరహము వేదనై
ఇక వల్లకాదంటూ వర్షమైన
ఆ ప్రేమ తడిని
తనువంత నలుగుల పూసుకుంటూ
గుప్పెడు మల్లెలు ఫక్కున నవ్వినట్లు
మట్టివాసన మధుపర్కమే అయ్యింది
ఏడడుగుల ఏరువాకె అయ్యింది
రేపటి పచ్చని పందిరిని తలుచుకుంటూ..
మంజుల సూర్య, హైదరాబాద్