వాణిజ్య మంత్రిత్వ శాఖ సోమవారం విడుదల చేసిన గణాంకాల ప్రకారం, డిసెంబర్ 2022లో భారతదేశ ఎగుమతులు 12.2 శాతం క్షీణించి 34.48 బిలియన్ డాలర్లకు చేరుకున్నాయి. గతేడాది ఇదే నెలలో ఇది 39.27 బిలియన్ డాలర్లుగా ఉంది. దిగుమతులు కూడా డిసెంబర్ 2022లో $58.24 బిలియన్లకు తగ్గాయి. గత ఏడాది ఇదే నెలలో $60.33 బిలియన్లగా ఉండేది. ప్రస్తుత ఆర్థిక సంవత్సరంలో ఏప్రిల్-డిసెంబర్ మధ్య కాలంలో దేశ మొత్తం ఎగుమతులు తొమ్మిది శాతం పెరిగి 332.76 బిలియన్ డాలర్లకు చేరుకున్నాయి.
ఈ కాలంలో దిగుమతులు 24.96 శాతం పెరిగి 551.7 బిలియన్ డాలర్లకు చేరాయి. అంతర్జాతీయంగా సవాళ్లు ఎదురైనా భారత్ ఎగుమతులు పెరుగుతున్నాయని వాణిజ్య కార్యదర్శి సునీల్ బర్త్వాల్ అన్నారు. ఎగుమతి గణాంకాలను వివరిస్తూ “కొన్ని ఆహార ఉత్పత్తులపై పరిమితులు ఉన్నప్పటికీ బియ్యం ఎగుమతులు పెరిగాయని తెలిపారు. “కొనుగోలు చేసే దేశాలలో మాంద్యం సవాళ్లు ఉన్నప్పటికీ, దుస్తులు ఎగుమతులను పెంచుకోగలిగాము. గ్లోబల్‌ సవాళ్ల కారణంగా దీన్ని చాలా ఉన్నత స్థాయికి తీసుకెళ్లలేకపోతున్నామన్నది వాస్తవమేనని అన్నారు.
అయితే స్థిరంగా ఉండగలుగుతున్నామని చెప్పారు. వాణిజ్య కార్యదర్శి మాట్లాడుతూ, ‘మేము వ్యవసాయ ఉత్పత్తులను ఎగుమతి చేయడం నుండి పూర్తి చేసిన వస్తువులను ఎగుమతి చేయడానికి మారాము. మేము మా ఎగుమతి బాస్కెట్‌ను పరిశీలిస్తే, మన మొత్తం ఎగుమతుల్లో 24 శాతం ఇంజనీరింగ్ వస్తువులు ప్రాతినిధ్యం వహిస్తున్నట్లు కనిపిస్తుంది అని అన్నారు. వ్యవసాయ ఉత్పత్తులు మరియు ముడిసరుకులను ఎగుమతి చేసే వారిగా కాకుండా చాలా ముందుకు వచ్చామని అందువల్లే వాల్యూ యాడెడ్ ఉత్పత్తులను ఎగుమతి చేస్తున్నామని తెలిపారు. రత్నాలు మరియు ఆభరణాలు, డ్రగ్స్ మరియు ఫార్మాస్యూటికల్స్, ఎలక్ట్రానిక్ వస్తువులు, రెడీమేడ్ గార్మెంట్స్ వంటి కొన్ని తుది ఉత్పత్తులను ఎగుమతి చేసే దిశగా కూడా ముందుకు సాగుతున్నామని ఆయన చెప్పారు.
