అంబాసిడర్

అమ్ములపొదిని భుజాన వేసుకుని

ప్రకృతి వొడిదుడుకులను లెక్కచేయక

తదేకదీక్షతో సాగిపోతున్నాడు

తూరుపు తెరలు తొలగకముందే

సూదంటు చూపులతో దూసుకుపోతూ

విషపు మూలాలను వొడిసిపడుతున్నాడు

అవిశ్రాంత నడకను సాగిస్తూ

వదలివేసిన, విసరివేసిన

ప్లాస్టిక్ భూతాలను పొదిలో కుక్కుతున్నాడు

మన సంస్కారం విసరిన అహంకార మకిలిని

విశ్వప్రేమికుడై తొలగించి తన వీపున తగిలించుకుని

స్వచ్ఛభారత్ సైనికుడై కదులుతున్నాడు

పిడికెడు ముద్దకోసం అశుద్ధాన్ని శుద్ధిచేస్తూ

అవని గర్భాన ప్లాస్టిక్ విషం చేరకుండా

అహర్నిశలు అశ్వమేథయాగం చేస్తున్నాడు

అతనొక నిరంతర శ్రామికుడు

నేలన కలుపును తొలగించే కర్షకుడు

చేతలతోనే కర్తవ్యాన్ని చూపుతున్న దార్శినికుడు

పర్యావరణ రక్షణకై కదులుతున్న శకటం అతను

పరిశుభ్రతకై నడుము కట్టిన శ్రమజీవి అతను

అవార్డుకోసం చూడని స్వచ్ఛభారత్ అంబాసిడర్ అతను

శింగరాజు శ్రీనివాసరావు, ఒంగోలు, మొబైల్ నెం. 9052048706