టీ20 ప్రపంచ కప్ 2021 ముగిసిన తర్వాత భారత్, న్యూజిలాండ్ మధ్య ద్వైపాక్షిక సిరీస్‌ ప్రారంభమైంది. ఇందులో భాగంగా ఈ రోజు మొదటి టీ 20 మ్యాచ్‌ జరిగింది. జైపూర్‌లోని సవాయ్ మాన్‌సింగ్ వేదికగా జరిగిన మ్యాచ్‌లో భారత్ 5 వికెట్ల తేడాతో ఘన విజయం సాధించింది. కివీస్ విధించిన 165 పరుగుల టార్గెట్‌‌ను సునాయసనంగా చేధించింది.
ముఖ్యంగా సూర్యకుమార్‌యాదవ్ 40 బంతుల్లో 6 ఫోర్లు, 3 సిక్సర్లతో 62 పరుగులు చేశాడు. మరోవైపు ఒపెనర్‌గా బరిలోకి దిగిన కెప్టెన్‌ రోహిత్‌ శర్మ 36 బంతుల్లో 5 ఫోర్లు 2 సిక్సర్ల సాయంతో 48 పరుగులు చేసి జట్టు విజయంలో కీలకపాత్ర పోషించాడు. కివీస్ బౌలర్లలో బోల్ట్‌ రెండు వికెట్లు సాధించాడు. మిగతా వారు ఎవ్వరూ పెద్దగా ప్రభావం చూపలేకపోయారు. అంతకు ముందు టాస్ ఓడి బ్యాటింగ్ చేసిన న్యూజిలాండ్ టీం 6 వికెట్లు కోల్పోయి 164 పరుగులు చేసింది. దీంతో టీమిండియా ముందు 165 పరుగుల టార్గెట్‌‌ను ఉంచగలిగింది.
కివీస్ టీంలో మార్టిన్ గప్టిల్ 70 (42 బంతులు, 3 ఫోర్లు, 4 సిక్సులు), మార్స్ చాప్‌మన్ 63(50 బంతులు, 6 ఫోర్లు, 2 సిక్సులు) అర్థ శతకాలతో ఆకట్టుకున్నారు. మిగతా బ్యాటర్లలో ఎవ్వరూ అంతగా రాణించలేదు. ఇక టీమిండియా బౌలర్లలో భువనేశ్వర్, అశ్విన్ తలో రెండు వికెట్లు, చాహర్, సిరాజ్ చెకో వికెట్ పడగొట్టారు.
