గ్రీష్మములో బీడువారి
చిరుగుల చీర కట్టిన ధరణి
తొలిజల్లు పలకరింపుతో
తడిసి ముద్దై
పారవశ్యమునొందిన ధరణి
పచ్చని పట్టుకీర కట్టి
కొత్త పెళ్లికూతురిలా సిగ్గుల
మొగ్గై ఒళ్లువిరుస్తూ
ఆనందహేలలో ఓలలాడుతుండగా
ధరణి అందాలను తనివితీర
చూడాలని రవి తహతహలాడుతుండగా
వాయునందనుడు చల్లగా స్పర్శిస్తుండగా
ఆ…. మధురతన్మయంలో పులకరిస్తుండగా
పక్షుల కువకువలు, పిల్లగాలుల సవ్వడులు
ఏకమైన గిలిగింతలు పెడుతుండగా
ఈ …. మధురాతిమధురాలు నావేకదా అని
తొలిజల్లు మరింత హుషారై
ధరణి ని అణువణువును
తన తుషారంలో తడుపుతుండగా
ప్రకృతి పట్టరాని ఆనందంలో తడిసి ముద్దవుతూ
తొలిజల్లు చినుకుల ముత్యాలను ఏరుకుంటూ
మైమరచిపోతున్న ప్రకృతిలో
నన్ను నేను మరువనా
ఎం.అనసూయ, జిపిఎస్ సరళాదేవి హట్స్, సైదాబాద్, హైదరాబాద్
