ఎన్నికల వ్యూహకర్త ప్రశాంత్ కిషోర్ ఇప్పుడు ఏం చేస్తున్నాడు? ఈ మధ్య ప్రశాంత్ కిషోర్ గురించి ఎక్కడా పెద్దగా వినిపించడం లేదు. కాంగ్రెస్ పార్టీలో చేరేందుకు వ్యూహాలు సిద్ధం చేసుకుని రాహుల్ గాంధీ తిరస్కరించడంతో వెనుదిరిగిన ప్రశాంత్ కిషోర్ ఆ తర్వాత జాతీయ పార్టీ పెట్టే దిశగా పావులు కదిపాడు.
జాతీయ పార్టీ పెట్టేందుకు ముందు తన స్వంత రాష్ట్రం అయిన బీహార్ లో పాదయాత్ర చేసి జనాలను సమీకరిస్తానని ప్రకటించి అదే పని చేయడం మొదలు పెట్టాడు. అయితే ఆయన జాతీయ పార్టీగానీ, బీహార్ లో ప్రారంభించిన జన సురాజ్ పార్టీ గానీ ఎక్కడా ప్రచారానికి నోచుకోవడం లేదు.
దాంతో ఆయన ఇప్పుడు బీహార్ ముఖ్యమంత్రి నితీష్ కుమార్ తో కలిసిపోయే ఆలోచన చేస్తున్నట్లు రాజకీయ పరిశీలకులు చెబుతున్నారు. ఇటీవలే నితీష్ కుమార్ బీజేపీతో బంధం తెంచుకుని ఆర్ జె డీతో అనుబంధం ఏర్పాటు చేసుకుని ముఖ్యమంత్రిగా కొనసాగుతున్న విషయం తెలిసిందే.
ఈ నేపథ్యంలో ఇప్పుడు ప్రశాంత్ కిషోర్ కూడా నితీష్ అండన చేరాలని భావిస్తున్నట్లు రాజకీయ పరిశీలకులు అంటున్నారు. గత కొన్ని రోజులుగా నితీష్ కుమార్, ప్రశాంత్ కిషోర్ పరస్పరం విమర్శలు చేసుకుంటున్నారు. ఇద్దరూ ఒకరిపై ఒకరు దుమ్మెత్తి పోసుకుంటున్నారు.
అటువంటి పరిస్థితిలో, రాజ్యసభ మాజీ ఎంపీ పవన్ వర్మ మొదట నితీష్ కుమార్ తరువాత ప్రశాంత్ కిషోర్‌ను కలిసినప్పటి నుండి ప్రశాంత్ కిషోర్ నితీష్ తో కలవబోతున్నట్లు వార్తలు గుప్పుమన్నాయి. ఐఏఎస్ అధికారి అయిన పవన్ వర్మ పదవీ విరమణ తర్వాత జేడీయూలో చేరారు.
2015 బీహార్ అసెంబ్లీ ఎన్నికలకు ముందు, ప్రశాంత్ కిషోర్‌ను జేడీయూలోకి తీసుకురావడంలో పవన్ వర్మ పాత్ర చాలా ముఖ్యమైనది. ఆ తర్వాత జేడీయూలో ప్రశాంత్ కిషోర్ గ్రూపులు కట్టాడు. ఈ గ్రూపు తగాదాల కారణంగా ప్రశాంత్ కిషోర్‌ని పార్టీ నుంచి బహిష్కరించడంతో పవన్ వర్మను కూడా జేడీయూ నుంచి వెళ్లిపోయారు.
ఆ తర్వాత పవన్ టీఎంసీలో చేరారు. టీఎంసీకి ఎన్నికల వ్యూహకర్తగా ప్రశాంత్ కిషోర్ పని చేసినప్పుడు పవన్ వర్మ అక్కడే ఉన్నారు. ఇప్పుడు టీఎంసీని పవన్ వదిలేశాడు. దీని తరువాత, మంగళవారం, అతను మొదట నితీష్ కుమార్‌ను కలుసుకున్నాడు.
ఆ తరువాత ప్రశాంత్ కిషోర్‌ను కూడా కలవడానికి వెళ్ళాడు. పవన్ వర్మ ప్రస్తుతం ఖాళీగా ఉన్నాడు. ఒక్కసారి రాజ్యసభ ఎంపీ అయ్యాక ఆయన రాజకీయ ఆశయాలు కూడా పెరిగాయి. జేడీయూ, టీఎంసీ రెండు పార్టీలనూ తిరిగిన పవన్ ఇప్పుడు మళ్ళీ కొత్త ప్రారంభానికి అవకాశాల కోసం చూస్తున్నాడు.
ఇలాంటి పరిస్థితుల్లో ప్రశాంత్ కిషోర్, నితీష్ కుమార్‌లను ఏకతాటిపైకి తెచ్చేందుకు ఆయన రంగం సిద్ధం చేసే పనిలో పడ్డారు. నితీష్ కుమార్‌ను కలిసిన తర్వాత, పవన్ వర్మ ఆయన అభిప్రాయాన్ని తెలుసుకుని పరిస్థితుల గురించి ప్రశాంత్ కిషోర్‌కు తెలియజేసి ఉండాలి.
ఇద్దరు నేతలను మళ్లీ కలపడంలో పవన్ సఫలమైతే వారి పరిస్థితి ఎలా ఉన్నా ఆయన రాజకీయ జీవితం మళ్లీ వెలిగిపోవచ్చు. టిఎంసిని విడిచిపెట్టిన తరువాత పవన్ వర్మ తన రాజకీయ జీవితం గురించి ఆందోళన చెందుతున్నాడు. అటువంటి పరిస్థితిలో ఆయనకు ఉన్న ప్రత్యామ్నాయం కేవలం జెడియు మాత్రమే.
జెడియులో పునరాగమనం చేయడానికి ఆయన ప్రయత్నిస్తున్నారు. ఇందుకోసం ఆయన నితీష్ కుమార్‌ను కలిశారేమో కానీ.. పని కాకపోవడంతో ప్రశాంత్ కిషోర్ వద్దకు వెళ్లి ఉండవచ్చు అని మరి కొందరు అంటున్నారు. జేడీయూలోకి తిరిగి వచ్చే అవకాశం లేదని భావించిన పవన్ వర్మ కొత్త పొలిటికల్ ఫ్రంట్‌ను సిద్ధం చేస్తున్న ప్రశాంత్ కిషోర్‌తో కలిసి వచ్చేందుకు ప్రయత్నాలు ప్రారంభించినట్లు కూడా మరి కొందరు అంటున్నారు.
