దాదాపు నెల రోజులుగా కనిపించకుండా పోయిన చైనా విదేశాంగ మంత్రి క్విన్ గ్యాంగ్ ను తాజాగా ఆ పదవి నుంచి తప్పించారు. ఆయన స్థానంలో మాజీ విదేశాంగ మంత్రి వాంగ్ యీ మళ్లీ విదేశాంగ మంత్రిగా నియమితులయ్యారు. క్విన్ గ్యాంగ్ కేవలం 207 రోజుల పాటు చైనా విదేశాంగ మంత్రిగా బాధ్యతలు నిర్వర్తించారు. క్విన్ గ్యాంగ్‌కు సంబంధించిన విదేశీ వ్యవహారాల మంత్రిత్వ శాఖలోని అన్ని రికార్డులను తొలగించినట్లు చర్చలు జరుగుతున్నాయి.
ఇప్పటి వరకు క్విన్ గ్యాంగ్ ఎక్కడ ఉన్నారో కూడా తెలియరాలేదు. మీడియా నివేదికల ప్రకారం, 57 ఏళ్ల క్విన్ గ్యాంగ్‌కు సంబంధించిన అన్ని రికార్డులను చైనా విదేశాంగ మంత్రిత్వ శాఖ అధికారిక వెబ్‌సైట్ నుండి తొలగించారు. అయితే, క్విన్ గ్యాంగ్‌కు సంబంధించిన సమాచారం ప్రస్తుతం స్టేట్ కౌన్సిల్ ఆఫ్ చైనా, వాణిజ్య మంత్రిత్వ శాఖ వెబ్‌సైట్‌లో అందుబాటులో ఉంది. ఆరోగ్య సమస్యల కారణంగా క్విన్ గ్యాంగ్ స్థానంలో వాంగ్ యి వచ్చినట్లు కొన్ని మీడియా నివేదికలు చెబుతున్నాయి.
అదే సమయంలో, బుల్లితెర యాంకర్‌తో ఉన్న సాన్నిహిత్యం కారణంగా అతన్ని ఆ పదవి నుండి తొలగించినట్లు కొన్ని కథనాలు వచ్చాయి. అధ్యక్షుడు జీ జిన్‌పింగ్ ఆయన పని పట్ల సంతృప్తి చెందలేదని, అందుకే ఆయనను పదవి నుండి తొలగించారని కూడా చర్చలు ఉన్నాయి. అయితే దీనికి సంబంధించి చైనా మీడియా ఇంకా ఎలాంటి అధికారిక ప్రకటన విడుదల చేయలేదు. క్విన్ గ్యాంగ్ చివరిసారిగా జూన్ 25న బీజింగ్‌లో రష్యా ఉప విదేశాంగ మంత్రి ఆండ్రీ రుడెంకోతో సమావేశమైనప్పుడు బహిరంగంగా కనిపించారు.
క్విన్ గ్యాంగ్ ఈశాన్య చైనాలోని టియాంజిన్ నగరానికి చెందినవారు. చాలా కాలం పాటు అధ్యక్షుడు జి జిన్‌పింగ్‌తో సన్నిహితంగా పనిచేశారు. 2018 నుండి 2021 వరకు ఆయన చైనా డిప్యూటీ విదేశాంగ మంత్రి పాత్రను పోషించాడు. జూలై 2021లో, క్విన్ గ్యాంగ్ US అంబాసిడర్‌గా నియమితులయ్యారు. కేవలం 17 నెలల తర్వాత, గ్యాంగ్ చైనా విదేశాంగ మంత్రిగా పదోన్నతి పొందారు.
