సీసమాలిక
వంగర బిడ్డడు వాసి కెక్కె నతండు
స్వీయ ప్రతిభ తోడ శిస్తు తోడ
తెలుగు కీర్తి పతాక దీప్తిని జగతిని
వ్యాప్తి చేసిన ఘనుడు బ్రాహ్మణుండు
బహు భాష నిష్ణాతు డహమెరుంగని మూర్తి
దేశ ప్రధానిగ తిరుగు లేని
తెలుగు ఠీవి యనగ వెలుగంగ మన “పీ. వి “
నిస్వార్థి మితభాషి నిత్య స్ఫూర్తి
కోర లేదు పదవి కోరి వచ్చిన యెడ
పదవి ఖ్యాతిని పెంచు పండితుండు
ఆర్థిక సంస్కర్త ! అభినవ చాణక్య !
తత్వవేత్త ! మౌని ! మేధావి యతడు
ఆ.వె. అల్ప బలము తోడ నైదు వత్సరములు
దేశమును నడిపిన ధిషణు డతడు
జన్మ మెత్తి నేడు శత వత్స రమ్ములు
నారసింహున కివె నతులు శతము .
ఆ. వె. “ వేయి పడగల” కృతివిబుధులు మెచ్చంగ
అనువదించి యతడు యశము పొందె
కీర్తి కాంక్ష లేని మూర్తి తెలుగు బిడ్డ
గుంపు లెఱుగ నట్టి గొప్ప వ్యక్తి.
శంభు దామోదర రావు, హైదరాబాదు
