బహు భాషలను జిహ్వ పై
మధుర భాషణంగా వేదిక పై
వేల్పుల చేసిన మహా పండిత వరేణ్యుడు!
తెలుగు ఖ్యాతిని ప్రపంచాన
ఓరుగల్లు తోరణంగా ప్రతాపం
చేసిన స్వభాషాభిమాని !
విలువలెరిగిన రాజకీయ
ఎత్తుగడలతో దేశాన్ని
అంతర్జాతీయంగా ఎవరెస్టు
శిఖరాయమానం చేసిన
అపర చాణుక్య ఘనుడు !
ప్రయోజన ప్రణాళికలు రచించి
దేశాన్ని అన్ని రంగాల
రంగ రంగ వైభవం చేసిన
మన ప్రధాన మంత్రి !
విద్యాప్రమాణాల ధారణగా
దేశంలో విద్యను తీర్చిదిద్దిన
మన దేశం పెద్ద బడి పంతులు !
మధ్యాహ్న భోజన పథకం
శ్రీకారం చేసి పేద బాలల
బడికి రప్పించిన ఆబాల గోపాల విద్యాతపస్వీ !
రైతు కుటుంబాన పుట్టిన వాడు
రైతు శోకం ఎరిగిన వాడు
పుట్టెడు పుట్టెడు ధాన్యం
పండేలా రైతుల నాగలికి
ఎన్నెన్నో రాయితీలు మొలకలెత్తించి నారు పోసిన
ఈ దేశపు రైతుల రారాజు !
ఆహా ! ఆడంబరమెరుగని
లాల్చీ ఉత్తరీయల పంచెకట్టు
తెలుగు వెలుగుల ప్రధాని !
పాములపర్తి వేంకట నరసింహా రావు శతజయంతి వేళ మన పూర్వ ప్రధాని
చరిత్ర పుటం పెట్టిన
నూరు పాఠాలుగా
మనకు అపూర్వం – ఆదర్శం !
– కందాళై రాఘవాచార్య, హైదరాబాద్, సెల్ నెం: 8790593638
