సురాసురులచే అర్చింపబడే ఆదిపరాశక్తి
అఖిలలోకాలను సంరక్షించే అంబాభవాని
సప్తమాతృకామూర్తిగా ప్రకాశింపబడే జగజ్జనని
సకల జీవకోటికి చైతన్యాన్ని ప్రసాదించే
అపూర్వ మహిమాన్విత దివ్యశక్తి శాంభవి
గ్రామాలలో అమ్మవారు రక్షణ వలయంలా వుంటూ
దుష్టశక్తులను దునుమాడి జనులను రక్షిస్తుందని
సిరి సంపదలు ఆయురారోగ్యసౌభాగ్యాల నిచ్చే
కారుణ్యమూర్తిగా భావించి పలు పేర్లతో పిలుస్తూ
అమ్మోరి జాతరను జరపడం మన సంప్రదాయం
వేల గ్రామాలలో గ్రామ దేవతగా కొలువై
తరతరాలుగా తెలంగాణ జనహృదయంలో నిలిచి
కన్నులపండువగా జరిగే బోనాల జాతరలో
ఎల్లమ్మతల్లిగా భక్తులచే పూజలందుకునే
అనంత శక్తి స్వరూపిణి అనురాగమయి సర్వేశ్వరి
అసురశక్తులు విజృంభించినపుడు చండిగా కాళిగా
పలు అవతారాలెత్తి శుభములనొసగిన శుభంకరి
ఆశ్వయుజంలో నవవిధ అలంకారాలతో
శరన్నవరాత్రులలో దుర్గాదేవిగా సేవించబడుతూ
వివిధ ప్రాంతాల్లో వివిధ నామాలతో విరాజిల్లుతూ
భక్తజనులు కొలచినంతనే కొంగుబంగారమై
ఏపేరున పిలిచినా తలచినా శరణువేడినా
ఎల్లలోకములను చల్లగాచూచే తల్లి జగదంబిక
పులి జమున, మహబూబ్ నగర్, 8500169682
