ఎన్నో అశలు ఎన్నన్నో కోరికలతో
రైతన్నల పండుగ ఏరువాక పూర్ణిమ
ఏతెంచింది
పోయినేడాది అప్పులే మిగిల్చిందా
ఆదాయాలనే ఇచ్చిందా అనేది పట్టదు
నేడు కోటి ఆశలతో మళ్ళీ హలం పట్టాడు
మన రైతన్న
పడమటి దిక్కున వగలుబోతూ
దోబూచులాడిన మబ్బులు ఆటలాపి
శుభ సూచకంగా చిరుజల్లులతో స్వాగతం పలికాయి
నెర్రెలు విచ్చిన పుడమి
ముందుగానే వచ్చిన
ఎర్రని ఆరుద్ర పురుగులతో
చారల మధ్య ఎర్రచుక్కల చీరె కట్టినట్లు
సింగారించుకుని దుక్కికి సిధ్ధమై
రైతన్నల గుండెల్లోఆనందం నింపింది
పైపై ఆనందమే కానీ, లోనంత దిగులే
సర్కారు సాయం అందుతుందో లేదో!
అన్నదాతకి దానం కోసం ఎదురుచూపులే కదా!
ఏదేమైనా, నష్టం వస్తుందని కర్తవ్యం మానవద్దని
చెప్పే వేదాంతి , రైతన్న కి
ఏరువాక పండగే మరి!
పీ.వి.యస్.కృష్ణకుమారి
