భారీ ఎత్తున మనీలాండరింగ్ కు పాల్పడిన సుఖేష్ చంద్రశేఖర్ తో సంబంధాలు కలిగి ఉండి ఎన్ ఫోర్సుమెంటు విచారణ ఎదుర్కొంటున్న బాలివుడ్ నటి జాక్వెలిన్ ఫెర్నాండెజ్ ఉదంతం మరువక ముందే అలాంటిదే మరో సంఘటన జరిగింది. ఈ సారి బిగ్ బాస్ కంటెస్టెంట్ కృతి వర్మ మరో మనీలాండరింగ్ కేసులో ప్రధాన నిందితుడిగా ఉన్న వ్యక్తితో కలిసి ఉంటున్నారని వెల్లడైంది. 263 కోట్ల రూపాయల మనీలాండరింగ్ కేసులో ఇప్పుడు ఈ నటిని ఎన్‌ఫోర్స్‌మెంట్ డైరెక్టరేట్ (ఇడి) విచారిస్తోంది.
రోడీస్, బిగ్ బాస్ సీజన్ 12లో కనిపించిన కృతి వర్మకు ఒక బాయ్ ఫ్రెండ్ ఉన్నాడు. పన్వేల్ భూషణ్ అనంత్ పాటిల్ అనే ఇతను పన్ను రీఫండ్‌లను మోసపూరితంగా కాజేసిన కేసులో ప్రధాన నిందితుడు. 2007-08 మరియు 2008-09 అసెస్‌మెంట్ సంవత్సరాలకు సంబంధించి బూటకపు రీఫండ్‌ల జారీపై వచ్చిన ఫిర్యాదు ఆధారంగా ఢిల్లీలో సీబీఐ నమోదు చేసిన ఎఫ్‌ఐఆర్ ఆధారంగా ED PMLA కింద దర్యాప్తు ప్రారంభించింది. అతను I-T డిపార్ట్‌మెంట్‌లో సీనియర్ ట్యాక్స్ అసిస్టెంట్‌గా పని చేస్తున్నప్పుడు అధికారుల లాగిన్ ఆధారాలను పొంది, ఇతరులతో కలిసి మోసాన్ని చేశాడు.
భూషణ్ అనంత్ పాటిల్‌కు చెందిన బ్యాంక్ ఖాతాతో సహా వివిధ బ్యాంకు ఖాతాలకు ఈ నిధులు బదిలీ చేయబడ్డాయి. పాటిల్ తో బాటు రాజేష్ శాంతారామ్ శెట్టి తదితరులపై ఐటీ చట్టం, 2000 కింద సీబీఐ ఛార్జ్ షీట్ దాఖలు చేసింది. నవంబర్ 15, 2019 మరియు నవంబర్ 4, 2020 మధ్య అధికారి ద్వారా 12 మోసపూరిత TDS రీఫండ్‌లు రూ. 263.95 కోట్లకు చేరాయని PMLA కింద జరిగిన దర్యాప్తులో వెల్లడైంది. ఈ ఆదాయాలు పాటిల్ మరియు ఇతర సంబంధిత వ్యక్తులు మరియు సంస్థల బ్యాంకు ఖాతాలకు మరియు షెల్ కంపెనీలలోకి బదిలీ చేయబడ్డాయి. పీఎంఎల్‌ఏ నిబంధనల ప్రకారం మహారాష్ట్ర, కర్ణాటకల్లో రూ.69.65 కోట్ల విలువైన 32 స్థిరాస్తులు, చర ఆస్తులను ఈడీ గత నెలలో అటాచ్ చేసింది.
అటాచ్ చేసిన ఆస్తుల్లో భూషణ్ అనంత్ పాటిల్, రాజేష్ శెట్టి, సారిక శెట్టి, కృతి వర్మ తదితరుల పేరిట ఉన్న భూమి, ఫ్లాట్లు, లగ్జరీ కార్లు ఉన్నాయి. కృతి వర్మ హర్యానాలోని గురుగ్రామ్‌లో 2021లో ఒక ఆస్తిని విక్రయించారు. ఆ డబ్బు బ్యాంకు ఖాతాల్లోకి వచ్చింది. వెంటనే సెర్చ్‌ ఆపరేషన్స్‌ నిర్వహించి మొత్తం అమ్మకం ద్వారా వచ్చిన రూ.1.18 కోట్లను ఆమె ఖాతాల్లో గుర్తించి స్తంభింపజేశారు. నేరం ద్వారా వచ్చిన డబ్బుతో నిందితుల పేరుతో లోనావాలా, ఖండాలా, కర్జాత్, పూణే, ఉడిపి ప్రాంతాల్లో భూమి, పన్వెల్, ముంబై ప్రాంతాల్లో ఫ్లాట్లు, మూడు లగ్జరీ కార్లు- BMW X7, Mercedes GLS400d, Audi Q7లను కొనుగోలు చేశారు.
