ఉక్రెయిన్‌లో యుద్ధ నేరాలకు పాల్పడినందుకు రష్యా అధ్యక్షుడు వ్లాదిమిర్ పుతిన్‌కు అంతర్జాతీయ క్రిమినల్ కోర్టు (ఐసిసి) శుక్రవారం అరెస్ట్ వారెంట్ జారీ చేసింది. ఈ వారెంట్‌పై ఉక్రెయిన్ కూడా స్పందించింది. ఇది ప్రారంభం మాత్రమేనని యుద్ధంతో అతలాకుతలమైన ఆ దేశం వ్యాఖ్యానించింది. వారెంట్ జారీతో బాటు పుతిన్ ముందు మరింత క్లిష్టమైన సవాళ్లు రాబోతున్నాయి. గత ఏడాది ఫిబ్రవరి 24న రష్యా ఉక్రెయిన్‌పై రష్యా దాడి ప్రారంభించిన విషయం తెలిసిందే. అప్పటి నుంచి రెండు దేశాల మధ్య యుద్ధం నడుస్తోంది.
ఈ సమయంలో ఉక్రెయిన్ పై చాలాసార్లు రష్యా దురాగతాలకు పాల్పడిందని ఆరోపించింది. ఐసిసి ప్రాసిక్యూటర్ కరీం ఖాన్ ఉక్రెయిన్‌లో యుద్ధ నేరాలు, మానవత్వానికి వ్యతిరేకంగా నేరాలు మరియు మారణహోమంపై ఏడాది క్రితం దర్యాప్తు ప్రారంభించారు. అయితే, మాస్కో యుద్ధ సమయంలో దురాగతాలకు పాల్పడినట్లు వస్తున్న ఆరోపణలను ఖండిస్తూనే ఉంది. రష్యా తన పొరుగు దేశం అంటే ఉక్రెయిన్‌పై దాడి చేసిన సమయంలో రష్యా సైనిక దళాలు ఎలాంటి దుశ్చర్యలకు పాల్పడలేదని రష్యా చెబుతోంది. పిల్లలను అక్రమంగా తరలించడం తదితర నేరాలపై పుతిన్ అరెస్టుకు ICC వారెంట్ జారీ చేసింది. పిల్లల హక్కుల కోసం రష్యా కమిషనర్ మరియా అలెక్సేవ్నా ల్వోవా-బెలోవాపై కోర్టు అదే ఆరోపణలకు వారెంట్ జారీ చేసింది.
ఇది ఆరంభం మాత్రమేనని యుద్ధంతో దెబ్బతిన్న దేశం ఉక్రెయిన్ పేర్కొంది. మరోవైపు చైనా అధ్యక్షుడు జీ జిన్పింగ్ సోమవారం నుంచి రష్యాలో పర్యటించనున్నట్టు వార్తలు వచ్చాయి. ఈ సందర్భంగా పుతిన్‌తో కీలక చర్చలు జరపనున్నారు. ఉక్రెయిన్‌లో యుద్ధాన్ని ముగించడానికి శాంతి చర్చల కోసం ఆయన రష్యా వెళ్తున్నట్లు చెబుతున్నారు. నేషనల్ పీపుల్స్ కాంగ్రెస్ (NPC) ఈ నెల ప్రారంభంలో చైనా అధ్యక్షుడు మూడవ ఐదేళ్ల పదవీకాలానికి ఆమోదం తెలిపిన తర్వాత ఇది ఆయన మొదటి విదేశీ పర్యటన. ఈ వారం ప్రారంభంలో, చైనా సహాయంతో సౌదీ అరేబియా మరియు ఇరాన్ మధ్య ఒప్పందం కుదిరింది. ఇరు దేశాలు తమ ఉద్రిక్తతలకు స్వస్తి పలికేందుకు అంగీకరించాయి. వారి మధ్య దౌత్య సంబంధాలు పునరుద్ధరించబడ్డాయి. ఈ పరిణామం తర్వాత, జిన్పింగ్ రష్యాను సందర్శిస్తున్నారు.
