తైవాన్‌ను చుట్టుముట్టేందుకు చైనా సిద్ధమవుతోంది. చైనా సైన్యం తైవాన్ సమీపంలో మూడు రోజుల పాటు విన్యాసాలు నిర్వహించనుంది. చైనీస్ ఆర్మీ PLA తూర్పు థియేటర్ కమాండ్ ఈ సమాచారాన్ని అందించింది. తైవాన్ అధ్యక్షుడు సాయి ఇంగ్ వెన్ ఇటీవల అమెరికా పర్యటన నుండి తిరిగి వచ్చిన సమయంలో చైనా ఈ నిర్ణయం తీసుకున్నది. తైవాన్ అధ్యక్షుడి ఈ పర్యటనపై చైనా ఆగ్రహం వ్యక్తం చేయడంతో పాటు చైనా విన్యాసాలు తమ అసంతృప్తికి నిదర్శనంగా నిలుస్తున్నాయి.
తైవాన్ చుట్టూ 13 చైనా విమానాలు, మూడు యుద్ధనౌకలు కనిపించాయి. తైవాన్ రక్షణ మంత్రిత్వ శాఖ ఈ విషయాన్ని ధృవీకరించింది. తైవాన్ స్వాతంత్ర్యం కోసం ప్రయత్నిస్తున్న వేర్పాటువాద శక్తులు, బాహ్య శక్తుల కుట్ర, రెచ్చగొట్టే కార్యకలాపాలకు వ్యతిరేకంగా ఈ ఆపరేషన్ గట్టి హెచ్చరికగా ఉపయోగపడుతుందని చైనా సైనిక ప్రతినిధి జి యి హెచ్చరించారు. తైవాన్ అధ్యక్షుడు సాయ్ ఇంగ్ వెన్ కాలిఫోర్నియాలో యుఎస్ హౌస్ స్పీకర్ కెవిన్ మెక్‌కార్తీతో సమావేశమయ్యారు. తైవాన్ అధ్యక్షుడు అమెరికా గడ్డపై అమెరికా స్పీకర్‌ను కలవడం ఇదే తొలిసారి. అధ్యక్షుడు సాయి ఇంగ్ వెన్ అమెరికా స్పీకర్‌ను కలవడం సరికాదని చైనా బెదిరించింది.
అయితే చైనా నుంచి వచ్చిన ఈ ముప్పును ఖాతరు చేయకుండా తైవాన్ అధ్యక్షుడు అమెరికా స్పీకర్‌ను కలిశారు. గతేడాది ఆగస్టులో అప్పటి అమెరికా ప్రతినిధుల సభ స్పీకర్ నాన్సీ పెలోసీ కూడా తైవాన్‌లో పర్యటించారు. అప్పట్లో కూడా దీనిపై చైనా తీవ్ర అభ్యంతరం వ్యక్తం చేస్తూ తైవాన్‌ను బెదిరించింది. చైనా బెదిరింపులకు తైవాన్ తలొగ్గలేదు. దీని తర్వాత, తైవాన్ ప్రాదేశిక జలాల చుట్టూ చైనా విన్యాసాలు ప్రారంభించింది. ఈ విధంగా చైనా అన్ని వైపుల నుండి తైవాన్‌పై ముట్టడి వేసింది. చైనాకు చెందిన 21 విమానాలు కూడా తైవాన్ సరిహద్దులోకి ప్రవేశించాయి. తైవాన్‌ను చైనా ముట్టడించిన తర్వాత, అమెరికా కూడా తన యుద్ధనౌకలను తైవాన్ సరిహద్దు చుట్టూ మోహరించింది.
