మోటారు వాహనాలకు సంబంధించిన డ్రైవింగ్‌ లైసెన్సులు, ఇతర పత్రాల గడువును కేంద్రం మరోసారి పొడిగించింది. కొవిడ్‌-19 నేపథ్యంలో జూన్‌ 30 వరకు పొడిగిస్తున్నట్లు ప్రకటించింది.
ఈ మేరకు అన్ని రాష్ట్రాలకు కేంద్ర రవాణా, రహదారుల మంత్రిత్వ శాఖ సూచనలు జారీ చేసింది. ఫిట్‌నెస్‌, పర్మిట్‌, డ్రైవింగ్‌ లైసెన్స్‌, రిజిస్ట్రేషన్‌, ఇతర రవాణా సంబంధిత డాక్యుమెంట్లకు ఈ పొడిగింపు వర్తిస్తుందని పేర్కొంది.
2020 ఫిబ్రవరి 1 నుంచి 2021 మార్చి 31 మధ్య గడువు పూర్తయ్యే పత్రాలకు ఈ మినహాయింపు వర్తిస్తుందని కేంద్రం తెలిపింది.
2021 జూన్‌ 30 వరకు ఆ పత్రాలు చెల్లుబాటు అవుతాయని పేర్కొంది. కొవిడ్‌ విజృంభణ నేపథ్యంలో ఇదివరకే నాలుగు సార్లు వాహనాలకు సంబంధించిన పత్రాల గడువును కేంద్రం పొడిగించింది.
