పిల్లగాలి వీస్తుంటే
చల్లని వెన్నెల కాస్తుంటే
తెల్లని మంచు కురుస్తుంటే
మసక మసక చీకటి
మత్తెక్కిస్తుంటే గుభాళించే
మల్లెపూల పరిమళాలు
గుండెల్లో గుబులు రేపుతుంటే
మంచు ముక్కలాంటి
గంధపు చెక్కలాంటి
చక్కని చుక్క ప్రక్కనేవుంటే
చిరునవ్వులు చిందిస్తువుంటే
చిలిపిచేష్టలతో
ఒళ్ళంతా జిల్లంటుంటే
ఆహా ఒళ్ళంతా
ఎంత తుళ్ళింత ! ఏమి గిలిగింత
ఎంత హాయి ! ఎంత హాయి!
ఎంత మధురమీరేయి! అంటూ
పరవశించిపోయే ఓ ప్రేమికులారా!
చూడ చక్కనైనవాడు
వెచ్చని వెన్నెల్ని కురిపించి
మీ ముద్దు ముచ్చట తీర్చే
ఆ అందాల చందురూడు
హఠాత్తుగా కనిపించకుండా
పోయాడని కలత చెందకండి
అందుకే ఓ ప్రేమికులారా!
ఆగండి కాస్త ఓపిక పట్టండి!
ఎక్కడికెళ్ళలేదు
చుక్కల్లో చంద్రుడు
మీ ప్రక్కనే వున్నాడు
మబ్బుల మాటున దాగిన్నాడు
కారుమబ్బులు కరిగిపోతే
తిరిగి మళ్ళీ మిమ్మల్ని
మత్తులో ముంచెత్తుతాడు
మీచే చిందులు వేయిస్తాడు
మిమ్మల్ని చిత్తుచిత్తు చేస్తాడు
అందుకే ఓ ప్రేమికులారా!
ఆగండి కాస్త ఓపిక పట్టండి!
పగలు రేయి
కౌగిలిలో కరిగిపోయే
కోర్కెలతో రగిలిపోయే
కొత్త జంటలచే
జన్మజన్మలకు మనమే
జతగా వుందామంటూ
ప్రమాణం చేయిస్తాడు
అందుకే ఓ ప్రేమికులారా!
ఆగండి కాస్త ఓపిక పట్టండి!
పోలయ్య కవి, కూకట్లపల్లి, అత్తాపూర్, హైదరాబాద్, 9110784502