మమత పెంచని మతము
స్ఫూర్తి నివ్వని గతము
జలధి నీటితొ సమము
ఓ నల్లనయ్యా .
దొంగ స్వాములు నేడు
మాయ మాటల తోడ
మతము చెరపిరి చూడ
ఓ నల్లనయ్యా .
అన్ని రంగము లందు
ఆడ వారే ముందు
అబల అబద్ధ మందు
ఓ నల్లనయ్యా ,
మత్తు మందున యువత
దారి తప్పగ భవిత
మాసి పోయెను చరిత
ఓ నల్లనయ్యా .
సర్దుక పోవు గుణము
కనుటె నేడది ఘనము
ఛిద్ర మాయెను గృహము
ఓ నల్లనయ్యా.
మాతృ భాషకు సమము
జగతి యందున కనము
మరువ కూడదు మనము
ఓ నల్లనయ్యా.
తల్లి దండ్రుల బ్రదుకు
తోడు కొరకు వెదుకు
ఆశ్రమాలే దొరకు
ఓ నల్లనయ్యా .
మామ కోడలు తోడ
ప్రేమ సరాగ మాడ
కొడుకును చంపె నేడు
ఓనల్లనయ్యా .
సంకుచిత భావమది
పెరుగగ అనుపద మది
బంధము తెగి పడినది
ఓ నల్లనయ్యా .
ధనముపై అత్యాశ
మోసపోయి నిరాశ
రోజు వారి తమాష
ఓ నల్లనయ్యా .
అక్రమార్కుల నీతి
అడుగు జాడను రీతి
పొందు చుండెను ఖ్యాతి
ఓ నల్లనయ్యా .
జనులు ధనమునె జూడ
బంధు ప్రీతియు నేడు
సన్న గిల్లెను చూడ
ఓ నల్లనయ్యా .
వారసత్వపు గరిమ
తెలియ జెప్పని ఫలము
అనుభవించగ మనము
ఓ నల్లనయ్యా .
వృక్ష సంపద తరుగ
భూమి తాపము పెరుగ
శీత నగములు కరుగ
ఓ నల్లనయ్యా .
భార్య భర్తల మధ్య
తగ్గి పోయె సయోధ్య
బ్రతుకు మారెను మిథ్య
ఓ నల్లనయ్యా .
మితము జీవిత మందు
మంచి బ్రతుకుకు మందు
ఆచరించుడి ముందు
ఓ నల్లనయ్యా .
మోసగించుట నేడు
నిత్యకృత్యము చూడ
దేశ ప్రగతికి చీడ
ఓ నల్లనయ్యా
వేష భాషల యందు
అనుకరణె పసందు
మార్పు రావలె ముందు
ఓ నల్లనయ్యా
మనిషి మనిషికి తోడు
మనిషె కానగ పరుడు
మంచి కాదిది వినుడు
ఓ నల్లనయ్యా .
కష్ట పడకయె యున్న
కలల బ్రదుకది యన్న
శాంతి బ్రదుకున సున్న
ఓ నల్లనయ్యా .
పెద్ద మేడలు నేడు
మనసు గువ్వల గూడు
బ్రతుకు యొంటరి కాడు
ఓ నల్లనయ్యా .
కాలు చంద్రుని పైన
ఎరుగము పొరుగు నైన
జగతి చిత్రపు కోన
ఓ నల్లనయ్యా .
శంభు దామోదర రావు (వశిష్ఠ), హైదరాబాద్, ఫోన్ నెం: 8074830704