ఓరుగల్లు పోరుగడ్డలో తెలంగాణ బిడ్డగా
ప్రభవించిన ప్రభాకరుడు పీవీ నరసింహారావు
పసితనంలోనే అంకురించిన దేశభక్తితో
నిజాం ప్రభుత్వం నిషేధించిన వందేమాతరగీతాన్ని
ధైర్యంగా గళమెత్తి ఆలపించిన ఉద్యమకారుడు
పదవులను ఆశించకయే సమర్థత సౌశీల్యంతో
రాజకీయాలలో అంచెలంచెలుగా ఎదిగి
ప్రధానమంత్రి పదవినలంకరించిన దక్షిణాత్యుడు
తిమిరాంధకారం అలముకున్న ఆర్థిక వ్యవస్థను
విప్లవాత్మకమైన సంస్కరణలతో పునాది వేసి
కాలానికి ఎదురు నిలిచిన మేరునగ ధీరుడు
ప్రజల గుండెల్లో గూడు కట్టుకున్న ప్రజానేత
దేశ చరితను మలుపు తిప్పిన మేధో సంపన్నుడు
పరిపాలనలో దీక్షాదక్షతలు కలిగిన ద్రష్ట
సంస్కరణలతో వెలుగు బాట చూపిన స్రష్ట
చరిత్రపుటల్లో అరుదైన స్థానం పొందిన సవ్యసాచి
మోముపై చెదరని చిరు దరహాసంతో
తెలుగు దనం ఉట్టిపడే నిరాడంబర ఆహార్యం
బహుభాషలలో విశేష పాండిత్యం గడించినా
హంగులుఆర్భాటాలకు అల్లంతదూరంలో వుంటూ
మౌనమే రూపుదాల్చిన వినిర్మల శాంతమూర్తి
నీతి నిజాయితీలే నిలువెత్తు ఆభరణాలై
ఎంత ఎదిగిన ఒదిగి వుండే స్థితప్రజ్ఞుడు పీవీ
తెలుగు సాహితీవనంలో పరిమళించిన సుమమై
నిబద్దత కర్తవ్య నిర్వహణయే ధ్యేయంగా
ఒడిదుడుకుల రాజకీయ జీవిత యానాన్ని
‘లోపలి మనిషి’గా ఆత్మకథాత్మక నవలను
ఆవిష్కరించిన సాహితీశిఖరం పీవీ
తెలంగాణ సాయుధ పోరాటంలో
తెగువ చూపిన వీర వనిత ‘గొల్ల రామవ్వ’ను
అక్షరీకరించిన నిత్య సాహిత్య పిపాసి
పాండిత్య పటిమచే వేయి పడగలను
హిందీలోకి అద్భుతంగా అనుసృజన గావించి
సాహిత్య అకాడమీ అవార్డు సొంతం చేసుకున్న
బహుముఖ ప్రజ్జావంతుడు పండితుడు
వ్యాస అనువాద రంగాలలో అందెవేసిన చేయిగా
సాహితీ సేధ్యం చేసిన బహుభాషా కోవిదుడు
నవనవోన్మేష పరిణామాలకు శ్రీకారం చుట్టి
భరతావనిలో నవయుగానికి నాంది పలికి
దేశ కీర్తి చంద్రికలను విశ్వవ్యాప్తం చేసిన
తెలుగు తేజోపుంజం పీవీ నరసింహారావు
-పులి జమున, మహబూబ్ నగర్