దొరల కుటుంబాల దురహంకృతిని జీల్చి
మించు మంచిగ నంకురించినాడు
చదువు సంధ్యల యందు నెదిగి ఉపాధ్యాయ
హృదయమ్ములన్ని జయించినాడు
పాలన రీతులు వాక్పటుత్వమ్ములు
హితులు బూర్గులతో గ్రహించినాడు
బహుభాషలను నేర్చి పలు దేశములలోన
ఘనమైన కీర్తిని గాంచినాడు
శ్రీ వినోబ భూదానోద్య మావహమున
నెంచి దాతృత్వ గుణముచూయించినాడు
బహుముఖీనముగా వెల్గు వజ్రమట్లు
పీ.వి. మన తెల్గు జాతికి ఠీవి నిజము!
నేతృత్వమ్ముకు మారు పేరయిన యా నెహ్రూ కుటుంబమ్ముకున్
ప్రీతిన్ గూర్చిన నీతిపూర్ణు డనగా పేరొంది నానాటికిన్
జాతిన్ యేలెడి సర్వ రంగములలో జాగృత్ప్రమాణుండునై
నేతై నిల్చెను పీ.వి.భారత ప్రజానీకంబు కీర్తించగన్!
మౌనముగా సమస్యల నమాంతము మ్రింగెడి ధైర్యశాలి! ప్రా
మాణిత ఆర్థిక స్థితికి మాన్యత గూర్చిన ధీవిశాలి ! స
మ్మానపు పాలనమ్ము బహుమానము జేసిన పీ.వి.
మా తెలం గాణము ముద్దు బిడ్డయని గర్వముగా వచియింతు నెప్పుడున్!!!
దోరవేటి (వి.చెన్నయ్య), జల్ పల్లి గ్రామం (వయా)మైలార్ దేవ్ పల్లి, హైదరాబాద్