మాతృత్వపు మాధుర్యాన్ని తలచుకుంటూ
పురిటి నొప్పులను సైతం లెక్కచేయకుండా
ప్రసవవేదను పంటి బిగువున భరించి
మృత్యువు అంచుల దరి చేరినా
ఓర్పు సహనాలకు నిదర్శనమై నిలిచి
అంతులేని మమకారంతో బిడ్డకు జన్మనిచ్చి
మరోజన్మ నెత్తిన అనురాగ దేవత అమ్మ
ప్రేమామృతాన్ని క్షీరంగా మలచి
అమ్మదనంలోని కమ్మదనాన్ని
చవి చూపించే అమృతమయి అమ్మ
ముద్దుమురిపాలతో మురిసిపోతూ
అక్కున చేర్చుకుని ఆనందించాల్సిన అమ్మ
ఆటుపోటుల జీవన సమరంలో
అలుపెరుగని పోరాటం చేస్తోంది
పసిబిడ్డను నడుముకు కట్టుకుని
ఆత్మీయ స్పర్శనందించి అభయమిస్తూ
ఇటుక ఇటుకను నెత్తిన పేర్చి పెట్టుకుని
బతుకు బాధ్యతలను భారంగా మోస్తూ
రేపటి భవితవ్యాన్ని కలలు కంటూ
స్వప్న సాకారానికి స్వేదం చిందిస్తోంది
అమ్మంటే అనిర్వచనీయమైన బంధం
నిస్వార్థ త్యాగగుణాల సంగమక్షేత్రం
శ్రమైక జీవన సౌందర్యానికి రూపం
భవితకు వెలుగులు దిద్దే కాంతి దీపం
మధురానుభూతుల మమతల నిలయం
పులి జమున