తిరిగిరాని వలస!

లాక్డౌన్ లో భీతిగొలిపే ఓ అర్థరాత్రి

రోడ్డుపక్కగా వలసల దిగులు కళ్ళు

దూరంగా ఇళ్ళలో నైట్ బల్బుల వెలుగులు

ఎవరి ఇళ్ళలో వాళ్ళు పదిలంగా

మరి తామో… ఈ పట్నంలో జనంలో ఉన్నా ఒంటరులు

మనసంతా తమ ఊరిమీదే..తమ ఇంటిమీదే

అమ్మా నాన్న కట్టుకున్న ఇల్లాలు

చిన్నా మున్నా బుజ్జి బాబీ ఎట్లున్నారో

దూరంగా లారీ… ఒక్కసారిగా చేతులన్నీ పైకి

డ్రైవర్ దయామయుడు

వలసల్లో అవధుల్లేని ఆనందం

ఈ లారీ తమ అదృష్ట దేవత

అందరిలో అదే భావన

ఎగబడుతూ ఎక్కేశారు

రయ్ మంది లారీ

తెల్లవారితే తమ తమ ఇళ్లల్లో

ఆలోచనలు…అలసట…మగత

హఠాత్తుగా భీకర శబ్దం.. లారీ బోల్తా

వలస కూలీలు మళ్ళీ వలసకు

ఈసారి మరో లోకానికి

జె.శ్యామల