ఊపిరి సలపని ఊహలు పగటి కలలై వెక్కిరిస్తుంటే
భవిష్యత్తంతా అంధకారాన్ని తలపిస్తుంటే
ప్రయాణపు అడుగుల్లో గమ్యం కానరాక
భవిష్యత్ ఆశలకు బిగించుకున్న ఉరితాడు
బానిసకొక బానిసకు ఊడిగం చేయలేక
బిగుసుకుపోయిన బంధాలను ఛేదించలేక
బాధ్యతల చెరసాలలో బంధీగా మారి
చేతకాక చేవలేక చేతులెత్తమంటున్న పిరికితనం
చెదలు పట్టి వెక్కిరించే ఆలోచనల గూడు
గుండెనిండా సుప్రభాతపు ఈసడింపులు
మనసంతా అవమానాల వైరస్ సోకి
మ్యాటరంతా డిలీటైనా మైండ్ ఇన్‌బాక్స్
భూమిపై పడింది మొదలు నిత్య పోరాటం
అడుగడుగునా అవంతరాల సంకెళ్లతో సహవాసం
ఫోల్డర్‌లతో నిండిన డెస్క్‌టాప్‌లా ఖాళీలేని జీవితం
నిరంతరం సంఘర్షణలతో సాగే బతుకు పయనం
మదిలో పరిగెత్తే అక్షరాలు కీబోర్డులో కనిపించక
సహనాన్ని పరీక్షించే మౌజ్‌లా స్ట్రక్ అయిన డాటా
ఎంతకీ ఓపెన్‌కాని ఫైల్‌లా రింగులు తిరిగే మస్తిష్కం
సర్వర్ డౌనయి కుప్పకూలిన నాడీ సిగ్నలింగ్ సిస్టం
ఒకే ఒక్కఛాన్స్ కొత్త బ్రెయిన్ చిప్‌ను సీపీయూలో చేర్చి
డిస్క్‌లనిండా పేరుకున్న వేస్ట్ ఫైళ్లను రీసైకిల్‌బిన్‌లోకి తోసి
నాలోని నాడీవ్యవస్థకు 5జీ అంతర్జాలాన్ని రీ కనెక్ట్‌చేసి
నిప్పులు చిల్చే శాటిలైట్ వేగంతో ఆలోచనలను అక్షరీకరిస్తా.
మ‌ధుక‌ర్ వైద్యుల, హైదరాబాద్, 8096677409
