ప్రపంచంలో నిజాయతీ గల నగరం అనే అంశంపై రీడర్స్ డైజెస్ట్ ఓ సామాజిక ప్రయోగం చేసింది. ఈ లిస్టులో మన దేశంలోని ముంబై రెండో స్థానాన్ని దక్కించుకుంది. తొలుత ప్రపంచవ్యాప్తంగా 16 నగరాలు ఎంచుకున్నారు. ఒక్కో నగరంలోనూ 12 వాలెట్లు అక్కడక్కడ వదిలివేశారు.
ఈ వాలెట్లలో ఓ ఏభై డాలర్ల విలువైన స్థానిక కరెన్సీ, వ్యాపారానికి సంబంధించిన కార్డులు, గిఫ్ట్ కూపన్లు.. మొబైల్ నెంబర్, వారి కుటుంబ ఫోటోలను ఉంచారు. కొంత వ్యవధి తరువాత ఏ నగరంలో ఎన్ని వాలెట్లు వెనక్కి తిరిగి వచ్చాయనేది పరిశీలించారు. అంటే, ఈ వాలెట్లు దొరికిన వారు అందులోని ఫోన్ నెంబర్.. కార్డుల్లోని ఎడ్రస్ ఆధారంగా వాలెట్ ఎవరిదీ అని తెలుసుకుని అప్పగిస్తారా? లేదా అనేది కొలమానం అన్నమాట.
ఈ లెక్కలో ఫిన్లాండ్ దేశానికి చెందినా హెల్సింకి టాప్ ర్యాంక్ కొట్టేసింది. అక్కడ వీరు వదిలిపెట్టేసిన 12 వాలెట్లలో 11 తిరిగి వారి వద్దకు చేరిపోయాయి. ఇక మన ఆర్ధిక రాజధాని ముంబయిలో 9 వాలెట్లు వెనక్కి వచ్చేయడంతో రెండో స్థానంలో నిలిచింది. ఇక చివరి స్థానంలో పోర్చుగల్ కు చెందిన లిస్బన్ నిలిచింది. ఇక్కడ వదిలేసిన వాలెట్లలో ఒకే ఒక్క వాలెట్ వెనక్కి తిరిగి వచ్చింది.
