కుమార్తె స్నేహితురాలు అంటే కూతురితోనే సమానం కదా. కాదని నిరూపించాడు ఈ కృరుడు. కూతురితో కలిసి ఉంటికి వస్తున్న అమ్మాయి (24)ని బలవంతం చేశాడో దుర్మార్గుడు. ఈ విషయం బయటకు రాకుండా ఆ అమ్మాయి కుటుంబానికి ఆర్థికంగా సాయం చేస్తూ వచ్చాడు.
ఆమె మరో వ్యక్తిని పెళ్లి చేసుకోవాలని నిర్ణయించుకోవడంతో గతంలో రేప్ చేసిన ఫొటోల్ని ఆన్‌లైన్‌లో పెడతానని బెదిరించాడు. దీంతో ఆ యువతి తెగించి, అతడిని బయటకు పిలిచి గొంతు కోసి చంపేసింది. ఈ ఘటన చెన్నైలో జరిగింది. చెన్నైలోని తిరివొట్టియూర్ ప్రాంతానికి చెందిన శేఖర్ (54) అనే వృద్ధుడి ఇంటికి తన కుమార్తె స్నేహితురాలు (24) తరచూ వస్తుండేది. ఆ యువతిని శేఖర్ నాలుగేళ్లుగా లైంగికంగా వేధిస్తున్నాడు.
అయితే అతడు తన కుటుంబానికి ఆర్థికంగా సాయం చేస్తూ ఉండడంతో ఆ వృద్ధుడి చేష్టల్ని మౌనంగా భరించింది. ఈ ఏడాది ఆమెకు పెళ్లి చేయాలని ఆమె తల్లిదండ్రులు నిర్ణయించారు. ఈ విషయం శేఖర్‌కు చెప్పడంతో గతంలో వారిద్దరూ కలిసి ఉన్న ఫొటోల్ని సోషల్ మీడియాలో పెడతానని ఆ అమ్మాయిని, వాళ్ల కుటుంబాన్ని బెదిరించాడు. దీంతో ఏం చేయాలో అర్థంకాక, అతడిని చంపేయాలని నిర్ణయించుకుంది ఆ యువతి.
సోమవారం వాషర్‌మెన్‌పేట్‌లోని ఓ ప్లే గ్రౌండ్‌కు పిలిచింది. నెమ్మదిగా అతడి కళ్లలో గమ్ పోసి కత్తితో గొంతు కోసి చంపేసింది. గ్రౌండ్‌లో డెడ్ బాడీని చూసిన స్థానికులు పోలీసులకు సమాచారం ఇచ్చారు. దీనిపై దర్యాప్తు ప్రారంభించిన పోలీసులు శేఖర్ స్నేహితులు, బంధువుల్ని విచారించారు. ఈ సమయంలో అతడి స్నేహితుడొకరు ఆ అమ్మాయితో శేఖర్ కు ఉన్న సంబంధం గురించి చెప్పాడు. దీంతో ఆమెను అదుపులోకి తీసుకున్న ప్రశ్నించగా తానే నేరం చేసినట్లు పోలీసుల దగ్గర ఆమె ఒప్పుకుంది.
