అవనితల్లికి అభివందనం!

సృష్టిలోని పంచభూతాలలో,

అతి పవిత్రమైనది అవనితల్లి..

అన్నపూర్ణకు తాను అమ్మతల్లి!

గుండెలు చీల్చి దుక్కిని దున్నినా,

సాలుసాలుకు నాగటిచాలునే ముద్దాడి,

పంట విత్తును పదిలంగా హత్తుకొని..

నేల పొరలలో పురుడును పోసిన వని..

మహిమగల మంత్రసాని మన భూజనని!

తన గర్భంనుండే ఆవిర్భవించిన

పచ్చని తరువుతల్లికీ, పువ్వుల తీగచెల్లికీ

తరగని ఆధారగని మన ఆమని అవని!

ఓ ధరణీ.. నీ గుండెలమీది కొండలతో,

ఆ కొండలమీది జలపాతాలను,

నదులను పాతాళానికింకనివ్వక,దాహార్తిని   తీర్చి, సుభిక్షతను కూర్చి

అడవులకెడదనుపరిచి వ్యాపించి,

పక్షులు జంతుజాలాలను రక్షించి,

ప్రకృతినీ పర్యావరణాన్ని పరిరక్షించే

రైతునేస్తమా.. మా జాతి సమస్తమా..

బ్రతికున్న మనిషిని గుండెలమీద మోసి,

మృతి చెందినంక నీ మృత్తికలో దాచుకొనే తల్లీ..

నీ ఋణం మేమెలాగూ తీర్చుకోలేనిది!

నిన్ను కాలుష్యం నుండి కాపాడుకోవడం మా విధి!

కె.వీణారెడ్డి, హైదరాబాద్ చరవాణి: 7337058025