ఆర్మీ చీఫ్‌గా జనరల్ ఎంఎం నరవాణే ఈ నెలాఖరుతో పదవీ విరమణ చేస్తుండటంతో ఆ బాధ్యతలను లెఫ్టినెంట్ జనరల్ మనోజ్ పాండే స్వీకరించనున్నారు. లెఫ్టినెంట్ జనరల్ పాండే ప్రస్తుతం ఆర్మీ స్టాఫ్ వైస్ చీఫ్‌గా పనిచేస్తున్నారు. ఆర్మీ స్టాఫ్ వైస్ చీఫ్‌గా బాధ్యతలు చేపట్టడానికి ముందు, ఆయన సిక్కిం, అరుణాచల్ ప్రదేశ్ సెక్టార్‌లలో వాస్తవ నియంత్రణ రేఖ (ఎల్‌ఎసి)ని రక్షించే బాధ్యత నిర్వర్తించారు.
ఇథియోపియా, ఎరిట్రియాలో UN మిషన్‌లో మనోజ్ పాండే చీఫ్ ఇంజనీర్‌గా పనిచేశారు. జూన్ 2020 నుండి మే 2021 వరకు అండమాన్ నికోబార్ కమాండ్ కమాండర్-ఇన్-చీఫ్ (CINCAN)గా ఉన్నారు. ఆయన విశిష్ట సేవకు పరమ విశిష్ట సేవా పతకం, అతి విశిష్ట సేవా పతకం, విశిష్ట సేవా పతకం, చీఫ్ ఆఫ్ ఆర్మీ స్టాఫ్ ప్రశంస, GOC-in-C ప్రశంసలు లభించాయి.
లెఫ్టినెంట్ జనరల్ పాండే డిసెంబర్ 1982లో బాంబే సపర్స్‌లో నియమితులయ్యారు. అప్పటి నుంచి ఆయన అన్ని రకాల భూభాగాలలో సాంప్రదాయ, డిఫెన్సు కమాండ్, స్టాఫ్ అసైన్‌మెంట్‌లను నిర్వహించారు. జమ్మూ, కాశ్మీర్‌లోని ఆపరేషన్ పరాక్రమ్ సమయంలో నియంత్రణ రేఖ వెంబడి ఇంజనీర్ రెజిమెంట్‌కు, పశ్చిమ సెక్టార్‌లో ఇంజనీర్ బ్రిగేడ్‌కు, ఎల్‌ఓసి వెంబడి పదాతి దళానికి మరియు పశ్చిమ లడఖ్‌లోని ఎత్తైన ప్రాంతాలలో పర్వత విభాగానికి కార్ప్స్‌కు నాయకత్వం వహించారు. జనరల్ నరవాణే పదవీకాలం ఏప్రిల్ 30తో ముగియనుంది.
