పాడవే కోయిలా పాడు
పాడవే తియ్యగా పాడు
వసంతం నీ ఊపిరి కదా
నిజాన్ని నిర్భయంగా గొంతెత్తి పాడు
న్యాయాన్ని జండాపై కెత్తి
అన్యాయాన్ని దునుమాడు
పాడవే కోయిలా పాడు
గ్రీష్మం వేసవితో తరుముకొచ్చినా
శిశిరం ఆకులను రాల్చివేసినా
హేమంతం చలితో స్మర్శించినా
శరత్తు చల్లని వెన్నెలను వెదజల్లినా
వర్షఋతువు చినుకులతో నాట్యమాడినా
నీ కాలం నీదే కోయిలా
పాడవే కోయిలా పాడు
కాలమెప్పుడూ ఒకటి కాదు
దానికి వేల కళ్ళు
నిరంతరం పహరా కాస్తూనే ఉంటది
కాగడై కాలాన్ని పట్టి చూపుతది
పాడవే కోయిలా పాడు
నువ్వు ఏ రాగాన్నెత్తుకున్నా
వసంతంలా ఎదలోతుల్లో
సప్తస్వరాలను పలికిస్తది
కొత్తకొత్త రాగాలను
మనసులను రంజింపజేస్తది
పాడవే కోయిలా పాడు
వసంతం నీ శ్వాస కదా
ఆకులు రాలినప్పుడే కదా
చిగురులను తొడుగుతూ వస్తావు
శిశిరాన్ని వెంటాడుతూనే
హేమంతాన్ని మోసుకువస్తావు
ఆగామి జీవితానికి ఆశలు కల్పిస్తూ
మాలో కొత్త ఆశలను చిగురింపజేస్తావు
– డాక్టర్ భీంపల్లి శ్రీకాంత్ 9032844017