రోళ్ళు పగిలే రోహిణి నుంచి
ముసురు పట్టే మృగశిర వచ్చింది
ముంగిట్లు చల్లబడ్డాయి
ముసలి ఎద్దు రంకె వేసిందో
లేదో తెలీదుగానీ
బక్క చిక్కిన రైతన్నల గుండెల్లో
మాత్రం చిరు ఆశలు చిగురించాయి
ఇన్నాళ్లు చూపంతా ఆకాశం వైపే
తొలకరి కోసం ఎదురు చూపులు
చినుకు రాలితేనే
దుక్కి దున్ని విత్తులు వేసేది
ఎదురు చూపులకు
ఫలితం దక్కింది
తొలకరి పలకరించింది
మట్టి వాసన, ముసురు పట్టిన ఆకాశం
అన్నదాత గుండెల్లో
చీకట్లను తొలగించింది
కళ్ళల్లో కోటి కాంతులు
దాహంతో నోరు తెరచుకొన్న
పుడమి మెత్తబడి,సాగుకు
సిద్ధమని పిలుపు నిచ్చింది
చద్దన్నం మూట కట్టుకుని
హలం పట్టి పొలం పోయి
దుక్కి దున్ని, వానచినుకుల్లో
తడిసి ముద్దవుతూ
విత్తు విత్తు నాటుతున్నా
గుండెలో గుబులే
ప్రతి యేటా ఉండే భాగోతమే
ఈ సంబరం మూన్నాళ్ళ
ముచ్చట అవుతదా
తొలకరి ఆనందాన్ని ఇస్తుందా
లేక అతివృష్టి అనావృష్టి తో
కడగండ్లను మిగులుస్తుందా
ముందు ముందు ఏదైతే ఏంటి
ఆశల్లో బతికే రైతన్నకు
ఇప్పటికిదే ఆనందం
ఆశలు తొలకరి
పీ.వీ.యస్.కృష్ణ కుమారి, తుర్కయాంజాల్
