ముగ్గులో ముచ్చటగా గొబ్బిళ్ళు
ఉబ్బు తబ్బిబ్బు వాకిళ్ళు
కళ కళ లాడుతూ ఇంటి ముంగిళ్లు
గుమ్మానికి పచ్చని పత్రమావిళ్ళు
బంతి చేమంతుల పచ్చని పరవళ్లు
గాలిపటమేమో పైపైకె వెళ్లు
ధాన్యాన్ని నింపుకొని వచ్చునెడ్లబండ్లు
కొంగ్రొత్త దుస్తులతో ఆడపిల్లలు తుళ్ళు
సరస సయ్యాటలలో కొత్త అల్లుళ్ళు
పిల్లా పాపలకి కనువిందు భోగిపళ్ళు
బంధుమిత్రుల కేరింతల ఆగళ్ళు
అంతటా ఆనందమే పొంగి పొర్లు
గంగిరెద్దు బసవన్నలు తిరిగేరు ఇల్లిల్లు
హరిదాసు సంకీర్తనలతో మైమరిచే ఒళ్ళు
చకినాలు లడ్డూలతో ఘుమ ఘుమలు వంటిల్లు
అందరి మోముపై చిరునవ్వు శోభిల్లు
తర్వాతి తరానికి చేరునివే వేళ్ళు
సంప్రదాయానికి పండుగలే ఆనవాళ్లు
ఆయురారోగ్యాలతో భోగ భాగ్యములతో
జీవించాలి అందరూ నిండు నూరేళ్లు
సంక్రాంతి శుభాకాంక్షలతో
మంజుల సూర్య, హైదరాబాద్