సంక్రాంతికి ఆహ్వానం

హేమంత ఋతువు లో

తెలి మంచువేళ

చేమంతుల సౌరభాలతో

ప్రతి ఇల్లూ సంక్రాంతి కి

స్వాగతమిస్తుంది

భోగి పండుగ నాడు

జగతిని పీడించే మహమ్మారిని

పాత వస్తువులతో పాటు

భోగి మంటల్లో మసిచేసి

పండుగ చేద్దాం.

భారతీయ సంస్కృతి కి

సంప్రదాయాలకు

జీవం పోసే

తెలుగింటి ముగ్గులతో

పడుచులు పాడే

గొబ్బి పాటలతో

హరిదాసు కీర్తనలతో

గంగిరెద్దుల ఆటలతో

చిన్నారులు ఎగిరేసే

గాలిపటాలతో

సందడి చేద్దాం.

బొమ్మల కొలువు పేరంటాలతో

పసివారిని దీవిస్తూ

పోసిన భోగి పళ్ళతో

పితృదేవతలకు మనసారా

అర్పించే తర్పణలతో

పాడి పంటలు సమృద్ధిగా

ఉండాలని..

పశువులను పూజిస్తూ

సంబరం చేద్దాం.

మారుతున్న

మకరరాశితో పాటు

మనందరి రాశులూ మారాలని

అందరి కోరికలు నెరవేరాలనీ

బాధలు, వేదనలు

సమసిపోవాలనీ

ప్రజలంతా సుఖశాంతులతో

ఆనందంగా ఉండాలని

సంక్రాంతి లక్ష్మి ని

ఆహ్వానిద్దాం.!!

ములుగు లక్ష్మీ మైథిలి, నెల్లూరు, ఫోన్:9440088482