శుభసంకల్పం

తమస్సుల తరిమి
ఉషస్సులనిస్తానంటూ
ఊరిస్తూ వచ్చింది ఉగాది
ఆనందంతోపొంగింది నా హృది
పేరులోఏముంది అనుకోవద్దు
పేరులోనేఉంది పెన్నిధి
ఉగాదిప్రసాదించే ఉషస్సులు
ఉర్విజనులకెల్ల ఆశీస్సులు
చిగిర్చిన ఈచైత్రం
నవచైతన్యానికి సంకేతం
హసించేవసంతం
జీవన వసంతప్రతిబింబం
మావికొమ్మల కోయిలమ్మల
గానం
ప్రజావళికి జయ మంగళ గీతం
ఓ మనిషీ!నీవు ఆశాజీవివి
నిన్ను బతికించే సంజీవనీ అదే
నిన్నటి నిరాశకు వీడ్కోలు పలికి
కొత్త ఆశలతో కదం తొక్కాలి
ఆశ పడితే అయిపోదు మనిషీ
చేయాలి నువ్వు నిరంతరకృషి
మంచిని పంచాలి ..పెంచాలి
సదాశయాల సాధనలో సాగాలి
అదే నీ సంకల్పం కావాలి

అప్పుడే ఈ వనిలో
ఆనందాల ఆమని విరిసేది
శాంతి.. సౌఖ్యం..సౌభ్రాతృత్వం
సర్వత్రా పెంపొందేది
శుభకృత్ పేరు సార్థకం అయ్యేది!

జె.శ్యామల