సంక్రాంతి దర్శనం!

ఆకాశాన ఎగిరే రంగురంగుల పతంగులు

ఇంద్రధనస్సు అందాలను ఇక మరిచిపొమ్మంటే

కదిలే ఊహలను కట్టిపడేద్దామని కుంచెనందుకున్నా !

వరి కంకులపై వాలుతూ పక్షుల కిలకిలలు

సూరీడి పలకరింపుకు పులకిస్తూ సెలయేటి గలగలలు

మనసు మంజులనాదం కాగా పాటందుకున్నా!

అటు చూస్తే ఆనంద నాట్యాల నెమలి

మైమరుస్తూ చేశా నేనూ పద నర్తనం

పట్నం నుంచి తరలి వచ్చిన చుట్టాలతో

పల్లె నిండా మమతల పరిమళం వీస్తుంటే

అంతరంగంలో  ఆత్మీయతానురాగాలు!

ముంగిళ్ల మురిపించే రంగవల్లులు

సుస్వాగతాలు పలుకుతుంటే

ఆనందాల మది అందిలా..

మంచి మార్పుకు సంకేతంగా

మకర రాశికి మారిన మార్తాండుడు

భోగిపండ్లు, బొమ్మల కొలువులు

కొత్త ధాన్యపు పొంగళ్ళు,  అరిసెలు

తియ్యందనాల సంతోషాలు

సరికొత్తగా దర్శనమిచ్చిన సంక్రాంతి!

సదా నిలవాలి ఈ సంస్కృతి !

జె.శ్యామల