గర్భాశయ క్యాన్సర్ నుండి మహిళలను రక్షించడానికి దేశీయ హ్యూమన్ పాపిల్లోమావైరస్ (HPV) వ్యాక్సిన్ త్వరలో అందుబాటులోకి రానున్నది. డ్రగ్స్ కంట్రోలర్ జనరల్ ఆఫ్ ఇండియా (DCGI) ఇటీవలే సెరమ్ ఇన్స్టిట్యూట్ ఆఫ్ ఇండియా (SII) అభివృద్ధి చేసిన గర్భాశయ క్యాన్సర్ వ్యాక్సిన్‌ను ఆమోదించింది.
త్వరలో ఇది దేశం నేషనల్ ఇమ్యునైజేషన్ మిషన్‌లో భాగం కావచ్చు. ఇమ్యునైజేషన్‌పై నేషనల్ టెక్నాలజీ అడ్వైజరీ గ్రూప్ స్టాండింగ్ సబ్‌కమిటీ ఇప్పటికే సెంట్రల్ ఇమ్యునైజేషన్ క్యాంపెయిన్‌లో ఈ వ్యాక్సిన్ ను చేర్చాలని సిఫార్సు చేసింది. తొమ్మిది నుంచి 14 సంవత్సరాల మధ్య వయస్సు గల బాలికలకు ఈ వ్యాక్సిన్ ఇవ్వవచ్చు. దేశంలోనే వ్యాక్సిన్‌ను సిద్ధం చేస్తున్నందున ధర పెద్ద విషయం కాదు.
ఈ ఏడాది చివరకు మార్కెట్ లోకి
ప్రస్తుతం, సీరం ఇన్స్టిట్యూట్ వ్యాక్సిన్ ధర గురించి ఎటువంటి సమాచారం ఇవ్వలేదు. అయితే ఈ ఏడాది చివరి నాటికి మార్కెట్‌లోకి రావచ్చని కంపెనీ చెబుతోంది. 26 ఏళ్లలోపు వారు కూడా అప్పుడే పెళ్లి చేసుకుంటే ఈ టీకాలు వేయించుకోవచ్చునచ్చని వైద్యులు చెబుతున్నారు.
ప్రస్తుతం దేశంలో రెండు HPV వ్యాక్సిన్‌లు ఉన్నాయి. వీటిని విదేశీ కంపెనీలు తయారు చేస్తున్నాయి. ఈ వ్యాక్సిన్‌లలో ఒకటి గార్డాసిల్, దీనిని మెర్క్ కంపెనీ తయారు చేస్తున్నది. మరొకటి సెర్వరిక్స్, దీనిని గ్లాక్సో స్మిత్‌క్లైన్ కంపెనీ వారు తయారు చేస్తున్నారు.
మార్కెట్‌లో హెచ్‌పీవీ వ్యాక్సిన్ ధర ఒక్కో డోసు రూ.2000 నుంచి రూ.3000 వరకు పలుకుతోంది. సీరం ఈ విభాగంలోకి ప్రవేశించినందున ధరలు తగ్గుతాయని ఆశిస్తున్నారు. ఈ వ్యాక్సిన్‌ను ప్రభుత్వం జాతీయ రోగనిరోధకత ప్రచారంలో చేర్చడం అనేది మహిళల్లో గర్భాశయ క్యాన్సర్ సమస్యను తగ్గించడానికి ఒక ముఖ్యమైన దశగా చెబుతున్నారు.
రొమ్ము క్యాన్సర్ తర్వాతి స్థానంలో గర్భాయ కాన్సర్
దేశంలో మహిళల్లో ఎక్కువగా వచ్చే క్యాన్సర్లలో ఇది రెండోది. రొమ్ము క్యాన్సర్ నంబర్ వన్. HPV సెంటర్ తాజా అంచనాల ప్రకారం, భారతదేశంలో ప్రతి సంవత్సరం ఒక లక్షా 23 వేల మందికి పైగా మహిళలు ఈ క్యాన్సర్ బారిన పడుతున్నారు. 77,000 మందికి పైగా మహిళలు మరణిస్తున్నారు.
అందుబాటులో ఉన్న సమాచారం ప్రకారం, ప్రస్తుతం దేశవ్యాప్తంగా ఐదు శాతం మంది మహిళలు ఈ వ్యాధితో బాధపడుతున్నారు. వారు HPV-16/18 బారిన పడ్డారు. అదే సమయంలో, దాదాపు 83 శాతం గర్భాశయ క్యాన్సర్లు HPV 16 లేదా 18 సంక్రమణ వలన సంభవిస్తాయి.
గర్భాశయ క్యాన్సర్‌కు HPV ఇన్‌ఫెక్షన్ ప్రధాన కారణం. ప్రపంచవ్యాప్తంగా దాదాపు 70 శాతం గర్భాశయ క్యాన్సర్‌లకు HPV 16 మరియు 18 ఇన్‌ఫెక్షన్‌లు కారణం. భారతదేశంలో 48.35 కోట్లకు పైగా మహిళల జనాభా ఉంది. వీరిలో 15 ఏళ్లు లేదా అంతకంటే ఎక్కువ వయస్సు ఉన్న బాలికలు, మహిళలకు గర్భాశయ క్యాన్సర్ వచ్చే ప్రమాదం ఉంది.
గర్భాశయ క్యాన్సర్ అనేది గర్భాశయం లేదా గర్భాశయం ముఖద్వారానికి సంబంధించిన క్యాన్సర్. పెరిగితే ప్రాణాపాయం కూడా ఉంది. గర్భాశయ క్యాన్సర్‌లో, గర్భాశయం ముఖద్వారం వద్ద ఒక కణితి ఏర్పడుతుంది. ఇది పరిసర కణజాలాన్ని నాశనం చేస్తుంది. ఈ క్యాన్సర్ వైరస్ వల్ల వస్తుంది. ఆ వైరస్ పేరు హ్యూమన్ పాపిల్లోమా వైరస్. HPV శరీరంలోకి ప్రవేశించిన తర్వాత క్యాన్సర్‌గా మారడానికి 10-15 సంవత్సరాలు పడుతుంది.
