రష్యాలోని కోస్ట్రోమా నగరంలోని ఓ కేఫ్లో శనివారం అగ్నిప్రమాదం సంభవించింది. ఈ ప్రమాదంలో కనీసం 13 మంది మరణించగా, మరో ఐదుగురు గాయపడినట్లు సమాచారం. అగ్నిప్రమాదంలో 13 మంది మరణించారని కోస్ట్రోమా ప్రాంత గవర్నర్ సెర్గీ స్టెన్నికోవ్ తెలిపారు. మరో ఐదుగురికి స్వల్ప గాయాలయ్యాయి. కోస్ట్రోమా మాస్కోకు ఉత్తరాన 340 కిలోమీటర్ల దూరంలో ఉంది.
ఇక్కడ జనాభా 2,70,000. ఎవరో ఫ్లేర్ గన్ ఉపయోగించడంతో కేఫ్లో మంటలు చెలరేగాయని స్థానిక అధికారులు తెలిపారు. రష్యన్ మీడియా ప్రకారం, మంటలు చెలరేగడానికి కొద్దిసేపటి ముందు కేఫ్లో గొడవ జరిగింది. అయితే, ఇది ఫ్లేర్ గన్ల వాడకానికి సంబంధించినదా అనేది ఇంకా స్పష్టంగా తెలియలేదు. ఫ్లేర్ గన్ను ఉపయోగించిన నిందితుడిని అదుపులోకి తీసుకున్నారు. కేఫ్ డైరెక్టర్ను కూడా అదుపులోకి తీసుకున్నారు. రెస్క్యూ సిబ్బంది 250 మందిని కేఫ్ నుండి బయటకు తీశారు. మంటలు చెలరేగడంతో కేఫ్ పైకప్పు కూలిపోయింది. ఇది 3,500 చదరపు మీటర్ల కంటే ఎక్కువ విస్తీర్ణంలో ఉంది. ఈ ఘటనపై క్రిమినల్ దర్యాప్తు ప్రారంభించి, నిందితుడిని పోలీసులు అదుపులోకి తీసుకున్నారు.