జమ్మూ కాశ్మీర్ స్వయంప్రతిపత్తికి నిర్దేశించిన ఆర్టికల్ 370ని తొలగిస్తూ కేంద్ర ప్రభుత్వం చారిత్రాత్మక నిర్ణయం తీసుకున్న తర్వాత ఆ రాష్ట్రానికి పెట్టుబడులు వెల్లువెత్తుతున్నాయని కేంద్రం వెల్లడించింది. గత మూడేళ్లలో జమ్మూ కాశ్మీర్‌లో 1559 భారతీయ కంపెనీలు, బహుళజాతి కంపెనీలు పెట్టుబడులు పెట్టాయని కేంద్ర హోంశాఖ సహాయ మంత్రి పార్లమెంట్ కు తెలియజేశారు. 2019 ఆగస్టు 5 న జమ్మూ కాశ్మీర్ నుండి ఆర్టికల్ 370ని తొలగిస్తూ కేంద్ర ప్రభుత్వం చారిత్రాత్మక నిర్ణయం తీసుకుంది.
దీని తర్వాత జమ్మూ కాశ్మీర్‌లో విదేశీ పెట్టుబడులకు మార్గం తెరుచుకుంది. 250 కోట్లతో నిర్మించనున్న మాల్‌కు గత నెలలో జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా శంకుస్థాపన చేశారు. 2020, 2021 మరియు 2022 సంవత్సరాల్లో 185 మంది బయటి వ్యక్తులు కేంద్ర పాలిత ప్రాంతమైన జమ్మూ కాశ్మీర్‌లో భూమిని కొనుగోలు చేశారని హోం శాఖ సహాయ మంత్రి నిత్యానంద్ రాయ్ బుధవారం రాజ్యసభకు తెలిపారు.
కేంద్ర పాలిత ప్రాంతమైన లడఖ్ నుంచి వచ్చిన సమాచారం ప్రకారం గత మూడేళ్లలో లడఖ్‌లో బయటి వ్యక్తి ఎవరూ భూమిని కొనుగోలు చేయలేదని హోం శాఖ సహాయ మంత్రి తెలిపారు. అదే సమయంలో, నేషనల్ క్రైమ్ రికార్డ్స్ బ్యూరో ‘క్రైమ్ ఇన్ ఇండియా’ పేరుతో తన నివేదికలో ఐపిసి, ప్రత్యేక, స్థానిక చట్టాల ప్రకారం, మైనర్లపై నమోదు చేయబడిన కేసులు తగ్గుతున్నాయి. 2019 సంవత్సరంలో మైనర్లపై 32,269 కేసులు నమోదయ్యాయని కేంద్ర హోంశాఖ సహాయ మంత్రి తెలిపారు. అదే సమయంలో, 2020లో 29,768, 2021లో 31,170 కేసులు నమోదయ్యాయి. 2019తో పోలిస్తే వీటిలో తగ్గుదల ఉన్నట్లు గణాంకాలు చెబుతున్నాయన్నారు.
