ముసురు కమ్మెను ఉసురుపై
ఎసరు పెట్టెను విషమై
అసరు చూపెను మరల నరులపై
కసురుతున్నది కరోనాయే అనుకుంటే
విసురుగా వచ్చెను విషవాయువులు
కసరు తీసేందుకు
మళ్ళీ ఉపద్రవం ఉరికివచ్చెను
ఉప్పెనలా ముంచెత్తెను
కుప్పలా పడేసెను శవాలను
ఒంటరి చేసెను ఎన్నో కుటుంబాలను
ఎంతని చెయ్యాలి మనిషి పోరాటం???
రెక్కలు తొడిగిన ధరలతోనా
రెక్కాడితే డొక్కాడని బతుకులతోనా
రక్కసికోరలు చాచిన కొరొనాతోనా
కాచుక కూర్చున్న కనపడని ఉత్పాతాలతోనా
గుప్పెడంత గుండె కోసం అంతులేని ఆరాటం
ఎంతకాలమీ చెలగాటం
ఒళ్ళు గుల్లవుతుండే
ఇళ్లు వల్లకాడవుతుండే
ప్రాణాలు చెల్లవుతుండే
గడిచే ప్రతి ఘడియ ఒక వరం అవుతుండే
పొరపాటొకరిది గ్రహపాటింకొకరిది
కారణం ఒకరు శిలువ వేసుకునేది మరొకరు
అజాగ్రత్త ఒకరిది ఆకాలమరణం మరొకరిది
తప్పిదం ఒకరిది శిక్ష మరొకరిది
ప్రతిసారీ ఇదే తప్పిదం
పునశ్చరణమవుతున్న దారుణం
ప్రకృతి తీర్పో పరమాత్మ తీర్పో
భుక్తాయించేది మాత్రం మానవుడే
సామాన్య మానవుడే
మంజుల సూర్య, హైదరాబాద్
2 comments
Awesome
చాలా బాగా వివరించారు