భువిని ఏలిన సుస్వరాల సామ్రాట్టు
దివికి ఏగెను పయనమై
కమనీయమైన పాటలతో
గాత్రమాధుర్యాన్ని అందించిన
గానగంధర్వం
వీరోచితంగా పోరాడి అలసి సొలసి
నేడు ఓడిపోయెను
దేశమే గర్వించదగ్గ
సంగీత దిగ్గజం
గొంతు నేడు మూగబోయెను
తీయగా పాడుతూ
స్వరాభిషేకం చేసిన
గానామృతం గంధర్వలోకానికి
తరలిపోయెను
సినీజగత్తులో
ప్రతి పాత్రకు చేసెను సమన్యాయం
అయినా గాత్రానికే వేసెను సింహాసనం
పదహారు భాషల్లో
ఒలికించెను తన గాత్రం
గోండు భాష వాటిలో ప్రత్యేకం
తేనెలోని మాధుర్యం
పూలలోని సుగంధాల
అపూర్వ సమ్మిళితం
ఆ గానామృతకలశం
తనకు తనే సాటిగా
తన తోటివారికి ధీటుగా
తన తర్వాతి తరానికి బాటగా
ప్రతి పాటలో పరకాయప్రవేశమే
ప్రతి బాణీలో పంచప్రాణమే
గొంతు దాటిన ప్రతి పాట
కోట్లజనుల గుండెలను శ్రుతి చేసిన మీట
ఉంటావు ఎప్పటికీ
అభిమానుల నోట పాటగా
అప్పటికీ ఇప్పటికీ మరెప్పటికీ
మరుపురాని మరిచిపోలేని
మా బాలుగా
మంజుల సూర్య, హైదరాబాద్
1 comment
అద్భుతమైన మాటలు