ప్రచండ భానుని ప్రతాపంతో
చుక్కనీరు కరువైన చెరువులు
దాహార్తితో నోళ్ళు తెరచిన బీళ్ళు
నెర్రెలుబారిన వాగులు వంకలు
బావురుమంటున్న బావులతో
పుడమితల్లి తల్లడిల్లే వేళ
ఉరుములు మెరుపులతో
కరిమబ్బులు కరిగి పోయి
శీతల పవనాలతో పలకరిస్తూ
తొలకరి జల్లు భువిని చేరగా
వేసవి తాపంతో వేసారిన
జనుల మనసు సాంత్వనమొందె
మట్టి పరిమళాలు గుభాళించగా
అన్నదాతల హృదిలో విరిసిన
ఆనందం అంబరాన్ని చుంబించగా
రైతన్నలు హలంచేత బట్టి
పొలం బాటన పయనించిరి
ప్రకృతి పచ్చదనంతో పరవశిస్తూ
ఉప్పొంగే జల వనరులతో
నవ చైతన్యంతో తొణికిసలాడింది
చెట్లు చేమలు పాడిపంటలతో
పసిడి సిరులతో విలసిల్లాలని
వ్యవసాయ పనిముట్లను శుభ్ర పరచి
పశువులను అందంగా అలంకరించి
కర్షక వీరులు దుక్కిదున్ని నాట్లు వేస్తూ
ఏరువాకను వైభవంగా జరిపే శుభతరుణం
పులి జమున, మహబూబ్ నగర్, 8500169682.
