సుడిగుండాలలో తలదూర్చడం,
సునామీలు కోరితెచ్చుకవడం,
మాటల భూకంపాలు సృష్టించడం,
చేతల ప్రళయ బీభత్సాలు పుట్టించడం,
మనిషొక అంతుబట్టని వింతజీవి!!
ఇసుకరేణువునూ వదలడు,
గడ్డిపోచనీ వదలడు!!!
ఈ కల్పిత మాయాజాల , మహేంద్రజాల మర్మాలు చూడ ,
ఎవరిదాష్టీకాలకోదోస్త్ ,జనులంతాబలి!
ఏవైనా తినొచ్చనే వాళ్ళ మతిలేనిచర్య
ముప్పుల కుప్పైకూర్చున్నది ‘కరోనా’ గా!
గబ్బిలాలు స్వేచ్ఛగా పుడితే ప్రకృతిస్థితి .
గబ్బిలాల్నితోటలాపెంచితే అసహజస్థితి
తలక్రిందువేళ్ళాటల సొల్లుతెచ్చిందో ఈపెంట,
తలమాసినపనులుతెచ్చెనో ఈ వైరస్ తంటా,
జీవరసాయన క్రిమిసృష్టి తెచ్చెనో ఈ మంట!
నిందలకు చిక్కని శత్రువిది!
సమరభేరీలనూ, సంయమనభేరీలనూ
అలవోకగ గెలిచామానాడు .
అంతుబట్టని ఆపద యుద్ధమీనాడు.
గెలుపు గురుతులు గుండెగోడలచేర,
ఒంటరి రాయిలా నవ్వడమూ నేర్వు!
కోట, బురుజుల నీ మనస్సునిప్పుడు
షీష్ మహల్ చేసి, దుఃఖ వర్ణాలద్దకు!
ఎట్లొచ్చెనోనని విదేశీయతనడగకు .
ఏ సాఫ్ట్ కార్నర్ లేనట్టు మాటలబాణాల వేయకు .
సాఫ్ట్ వేర్ ఉద్యోగ సద్యోగమే నీ స్టోరీలో!
క్షణాలతో సవాల్ చేస్తూ , కబుర్లపై సవారీ చేస్తూ,
సెల్లు సెల్లులుగా ఆన్ లైన్ నవ్వువీ , ఏడుపువీ నువ్వే అయ్యి ,
బొమ్మలపెట్టె ముందు బొమ్మవూ నీవే అయిన సాంకేతికత భాగ్యమంతా నీకెట్లొచ్చిందట? ఇకచెయ్యాల్సిందేంటి?
నీకు నీవే కవచమై,
నీ మేధస్సు కత్తికి నీవే ఒరవై,
ఒరిపిడివై, ఓపికవై..
ఒక్కడివే ఒంటరి సైన్యానివై …
అక్కడ ఇక్కడ అంతటనీవై తిరుగక,
గుంపుల గంపెడు ‘ఖర్చువు’ గాక,
నీదైన తెలివికి నీవే జోడు గుర్రానివిగా !
శుద్ధివై, శుభ్రతవై, శ్రద్ధ వై ,
నీ నమ్మకాల శక్తి యుక్తివై,
గుండె గడప దాటక..
అవసరమంటూ నీఇంటిగడపనూ దాటక,
మెర్సీలెస్ ‘కరోనా’ పై సెల్ఫ్ పోలీసింగ్ చేయి!
నీ శరీరమనే దేహదేశ సరిహద్దులోనికి
వైరస్ అనే శత్రువు జొరబడకుండా
జాగ్రత్తవు నువుగా…
సుడిగుండాలొద్దు , సునామీలొద్దు!
సెల్ఫ్ పోలీసింగ్ ముద్దు!
సెల్ఫ్ పోలీసింగ్ఈజ్ సోషల్ పోలీసింగ్
కొండపల్లి నీహారిణి
