పుష్యరాగం

క్షణక్షణానికో

రాగ మెత్తుకుంటుంది

కాలం

ఋతువు ఋతువుకో

వర్ణచిత్రాన్ని గీస్తుంది

కాలం

తన గమనాన్ని

మార్చుకున్నప్పుడల్లా

సరికొత్త కృతిని రచిస్తుంది ప్రకృతి

మకర సంక్రమణ వేళ

మంగళ తోరణాలు కడుతుంది

రంగవల్లికలతో తెలుగు లోగిలి

భోగభాగ్యాలను

ప్రసాదించే భానుడికి

భోగిమంటలు స్వాగతం పలుకుతాయి

గొబ్బిపాటలు సుప్రభాతం పాడుతాయి

గాదెల్లో నిండిన ధాన్యరాశి

పిండివంటల నైవేద్యం పెడుతుంది

కవుల వర్ణనల్లో

తీగసాగిన కవితాక్షరాల్లోనో

చిత్రకారుని కుంచె జాల్వార్చిన

వర్ణచిత్రాల్లోనో

వెండితెర వెలుగుల్లోనో

బుల్లితెర జిలుగుల్లోనో శిల్పారామాల్లోనో

చిందేసే కళారూపాల్లోనో తప్ప

కనిపించని

హరిదాసుల్నీ గంగిరెడ్లనీ

బుడబుక్కలోల్లనీ బాలసంతుల్నీ

అంతరించిపోతున్న సంస్కృతీ సంప్రదాయాల్నీ తలచుకొని

పాత తరం నాస్టాల్జియాని నెమరేస్తుంటే

కొత్త తరం కొంగ్రొత్త ఆశల గాలిపటాల్ని అంతరిక్షాన ఎగరేస్తుంది

కాలమెప్పుడూ

ముందుగామే కానీ మందగామి కాదు.

నూటెంకి రవీంద్ర, లక్షెట్టిపేట ఫోన్: 9491533295