అనంత నీరవ నిశీధి
కనులు తెరవలేను కదలలేను
భరించరాని దుర్గంధం వల్ల
యోగనిద్రలో ఉన్న నాకు
వినిపించిందో అద్భుత గానం
అమృత పలుకులు
ఆపాట, మాట అమ్మవి
నాలోని నైరాశ్యం పోయింది
నాకు కావలసినవన్నీ ఇచ్చింది
తన నోటితో ఆహారాన్నిచ్చింది
తన శ్వాస లో సగం నాకు ఇచ్చింది
తాను నరక బాధను అనుభవిస్తూ
బ్రహ్మ సృష్టి కి ప్రతి సృష్టి చేస్తూ
ఆ చీకటి మురికి కూపం నుండి
నన్ను వెలుగులోకి తెచ్చింది
తను పాడే జోలపాట
నాకు జీవిత పాఠాలను నేర్పింది
తన ఒడి నాకు ఎనలేని
ధైర్యాన్ని ఇచ్చింది
కంటికి కనపడక, విశ్వమంతా
వ్యాపించి ఉన్న ప్రాణాధారమైన
స్వచ్ఛమైన గాలి వంటి అమ్మ ప్రేమ
ఓ అద్భుత శక్తి
అదే నా ధైర్యం ,
అదే నా విజయం
(మాతృ దినోత్సవం సందర్భంగా)
పీ.వి.యస్.కృష్ణకుమారి