అమావాస్యలా అలుముకున్న
కరోనా కారు చీకట్లలో
వెన్నెల రేయిగా నీవొస్తుంటే
నల్లని తారురోడ్లు
ఒళ్లంతా కళ్ళు చేసుకున్నాయేమో
అన్నంతగా
నీవొచ్చే ఘడియ కోసం
గడియ తీసి నిలబడ్డట్లుగా
ఎదురుచూస్తున్నాయి
ధాన్యపు గలగలలా వచ్చి
వాకిలి వైపు చూడొకసారి
బంధువులు బంధుత్వాలు చుక్కల్లా కలిసిపోయి నీకు స్వాగతమిస్తున్నట్లే ఉంది
ఇంకాస్త ముందుకెళ్లు
ద్వార తోరణం అనురాగ తోరణమై
వారధిలా నీకోసం పడిగాపులు కాస్తోంది
దాటుకుని వెళ్ళావా
పట్టు పరికిణీల రెపరెపల్లో
సాంప్రదాయం నిలువెత్తు అందమై
నిను కనువిందు చేస్తుంది
వంటింటి వైపు వెళ్ళు మరి
పిండివంటలన్నీ
నవ వధువులా వయ్యారాలు పోతున్నాయి
అందీ అందకుండా అందాలని
నీ నోట్లో వెయ్యగనే కరిగిపోవాలనీ
భుక్తాయాసంగా ఉందా
మిద్దెపైనకి వెళ్లు
నింగి నేలకు వంతెన అవ్వాలనే
గాలిపటం తాపత్రయానికి
ఊతమవ్వు మరి
ఇలా అంతటా మాతో మమేకమై
ఊరంతా ఇల్లంతా మనసంతా నీవై
భోగి మంటల్లో భోగి పళ్లలో
గొబ్బిలో గంగిరెద్దు నడకలో
హరిదాసు సంకీర్తనంలో
త్రికాలాల్లా త్రికోణంలా
త్రిపతాకంలా త్రికరణంలా
త్రిమూర్తులు త్రిజగన్మాతలు
భోగి సంక్రాంతి కనుమలో
నెలవై కొలువై ఉండేలా
శుభాశీస్సులను మోసుకొస్తావని
ఆశిస్తూ
మంజుల సూర్య, హైదరాబాద్
