కాలమహిమ!

ఎవరికైనా రోజుకు ఇరవై నాలుగు గంటలే

కానీ ఎవరి జీవితకాలం ఎంత ?

ఎవరి ఖాతాలో ఎంత కాలం ఉందో

ఎవరు చెప్పగలరు?

కాలం కొందరిని కరుణిస్తుంది

కొందరిని శపిస్తుంది

కొందరికి వేదననిచ్చి వేధిస్తుంది

కొందరికి ఆనందానిచ్చి అలరిస్తుంది

కలిసొస్తే పకపకలు

కాటేస్తే విలవిలలు

ఎవరికి ఏవి అమృత ఘడియలో

ఎవరికి ఏవి యమగండ కాలాలో

అంతా అయోమయం

కాలం..పని లెక్కలయితే తెలుసు కానీ

ఎంత కాలంలో .. ఏ స్థాయిలో

ఎంత సుఖమో..ఎంత దుఃఖమో

ఎవరు చెప్పగలరు?

పరుగులు తీసే కాలంలో

పడుతూ..లేస్తూ

అనుభవం వచ్చిందని అపోహ తప్ప

కాల మహిమ తెలియతరమా!

జె.శ్యామల