హేమంతానికి శీతల సీమంతంచేసి
శిశిర పవనం ఎండుటాకుల్ని రాల్చి
చైత్రమనే శుభముహూర్తాన్ని ఎంచి
వసంత ఋతుపర్ణ పల్లవమనే పాన్పుపై
సంతసాలఋజువులనే పచ్చని ప్రభలతో
‘ఉగాది సంస్కృతి’ అనే అధ్బుత శిశువును
ప్రతియేటా మనకందిస్తుంది ప్రకృతీమతల్లి!
ప్రకృతికీ ప్రాణికోటికీ చక్కటి సంబంధమున్నసరికొత్త చైతన్యమీచైత్రమాసం..
అశుభములు తొలగించి జగతికి
శుభములు గూర్చవచ్చిన శుభకృతీ
నీకు మా శోభాయమాన స్వాగత కృతి!
ఈ అపురూప సృష్టి చిత్రానికి
ఏ చెడు దృష్టినీ సోకనీకుండా
ఏ వైరస్ లు కూడా తాకకుండా
పర్యావరణం పాడు కాకుండా
ప్రాణికోటికి ఏ కీడూ సోకకుండా
మంచి సృష్టిగా మనం మలచుకుందాం..
భావితరాలకు బంగారుబాటలు వేసుకుందాం!
కె. వీణారెడ్డి, హైదరాబాద్